theme-sticky-logo-alt
theme-logo-alt
Advertisement ad1
Advertisement ad1

Dawa ka Congress wow pyndooh man MLA ya ki 12 ngut kiwa yut seiñ

Ka Meghalaya Pradesh Congress Committee (MPCC) hapoh i yahkhmat u President, u Vincent H Pala ryngkat ki MLA ka Party, ynne ka sngi da lai booh ki ya ka ujor ha u Lamphang ka yung dorbar chna-aiñ pyrchah ya ki 12 ngut ki MLA heiwa da dawa leh wow pyndooh noh ya ki wow man kam ki MLA hadien wa da lai psiah ki cha ka All India Trinamool Congress.

Hawa klam wa kiwa pathai khubor, kiwa kitkaam wa thymme ka Congress Legislature Party, ka Dr. M. Ampareen Lyngdoh da ong ko wa ini i ujor toh hajrong wow pyrchah wei wow khang ya kawon kawon ka seiñ wa ymtoh wow em kam ini i kaam yut seiñ iwa da daisarom ya ka saiñhima ha ka jylla.

Da ong ko wa katkam ka Tenth Schedule da em boon ki kyndon wa hap wow bood khamtam wa hadooh katni ka Trinamool Congress ympu em ko ha ka jylla wei ym em ko leh ya kiwa kitkaam næ yung krehkaam ha ka jylla. Da ong ko leh wa ka Congress da thoh ko pyrchah waroh ki MLA kiwa lai psiah cha ka Trinamool Congress neibhah chwa wow mih na ka Party leh ym em u pyntip cha kiwa kitkaam ka Party tangwa da mih ki katwa ngait wei toh i kaamram yong ki wow pynche katni.

Heiyatoh wa i kam ki 12 ngut ki MLA wa ym chah ktah de ha ka aiñ yut seiñ neibah wa da em ki hadooh 2 na ka 3 bynta i boon bru (Two Third), ka Ampareen da ong ko wa hadooh katni ympu che wei ya kini kiyi kiyi ki stat aiñ daw leh ki yeiwa emkaam wei em leh chiboon ki kyndon kiwa ye wow yakhun wow pyndooh MLA ya ki 12 ngut.

Neiliang u muktiar, u VGK Kynta da ong u wa i yakhun ha ka aiñ, ka Congress em ko cha i liang i jop tangwa da kyntait u leh wow khana iwon iwon hajrong ini wow chim ki kam kiwa yasaaid aiñ heiwa da kdaw u wa em leh kiwi ki kyndon ha ka aiñ wa ye wow pyndooh man MLA ya ki 12 ngut hajrong ka kyndon wa ar na ka le bynta i em paaid.

Share this:
Previous

Da pynthymme ya i dor phñiang-charak ha East Jaiñtia

Next

Daw bichaar bniah ya ka ujor pyndooh MLA ya ki 12 ngut: Metbah Lyngdoh