Ki 5 tylli ki seiñbhalang wa kynthup ya ka JSM, JSU, MPUF, HNYF, FKJGP kiwa da seiñ ini wa dep da ka Nartiang Modop Coordination Committee, da lai e dorkhat ki ha ka SDSEO West Jaiñtia Hills District hadien wa ha ka 22 tarik da chem ki yeiwa duna ha ki ar tylli ki skur wa kynthup ya ka Nartiang Pohchnong Govt. LP School wa ka Nartiang Modop LP School.
Ka Committee da chem ko wa kini ki skur emkaam ki ya kiwa sikai, wei ki yung skur leh da sih ware ki wei duna ki kamra Class wa ki paikhana.
Da chem leh wa khian ki pchem wei ym em kær pood ya ka wei wa duna ki chuki, ki miej wa kiwi kiwi.
Ha ki snem wa dadep ki bor pynlai ki skur da jooh thoh ki cha ki bor sorkar hajrong i duna wa i emkaam kini ki skur iwa khlem man kaam hadooh katni.
Hajrong kini kiyi kiyi ka Committee da yachem ko ya ka SDSEO kawa da paan por hapoh chi tayaw wow yaklam ko heiyatoh wa ini neidaw wa ka dang wan thymme ko ha kani ka yung krehkaam.
Neiliang ka Committee da iwi i sur da rai ko wow booddien ya ini i dawa neibynta i bha i miat ki khynnah kini ki ar skur.