Ka Jaiñtia National Council Western Zone ha ka 5 tarik uni u bnai hapoh i yahkhmat u President yong ka, u Hamehi Bamon da lai booddien biang ko na ka DMHO ka West Jaiñtia Hills District hajrong i daw wa khlaad ka Pynchei Bareh kawa dang punkhon iwa da jia ha ka 4 tarik u Naiynru 2025 ha MCH Hospital, Jowai nei leh stiñ kiwa kreh kani ka thaw sumaar.
Ha ka sngi wa bood hadien iwa jia, ka seiñ da lai yachem ko wa ka DMHO wei da e leh chirup dei thoh wow dawa u thooh tre yei leh stiñ kini kiwa kreh kani ka Hospital wei wow pynchitom leh ya ki neibhah da dooh ar ylli ki mynsien yong ka bei wa i khonboo wa dang pun.
Da dawa joor leh u pynyoh yei hok ka Pynchei Bareh deiwa bahkhlieh ya ki khon yong ka kiwa da ieh khonswet ko chadien ha waroh ki liang.
Ha ini i lai booddien biang ka seiñ, neiliang ka DMHO da ong wa ha u bnai u wa dadep hadien wa wan kylli ka seiñ neibhah ka Report, ka da thoh biang ko wei da phah biang ko cha ka DHS wow pynkynmoo biang khnang wow yoh smat yei yarap ha katai ka yung. Heijooh i por leh da kular ko ya ka seiñ wa hapoh ka 15 tarik uni u bnai wow e ko yei jubab deiwa chimkhia ko leh wow yaklam wa ki bor kiwa haneiñ.
Ka seiñ da dawa ko leh wa ya ka Report wa mih nei takit yeiwa jia toh u pynyoo paidbah ka.
Ka seiñ da maham ko ko leh wa lada ym leh næ chimkhia ki ya kani ka kaam kamwa kular ka DMHO hapoh ka 15 tarik, ka seiñ daw chim ko da kawi tawon ka luti kawa eh.
Discussion about this post