Jowai: Ka North East Students’ Organisation (NESO) hadien wa yachem ko ynne ka sngi wa u montri ka sorkar pyrdi wa pait yaka kaam pohyung u Amit Shah ha New Delhi hajrong ka Citizenship (Amendment) Bill (CAB). U Chairman ka NESO, u Samuel Jyrwa da ong u wa ka NESO ka yieñ pyrchah ko yaka CAB hajrong ka yurim wa daw ktah ko ya ki jaitbru kiwa man ki tre ri tre muluk kiwa khian paaid ka thaaiñ North East deiwa ong leh wa ka sorkar pyrdi toh u sñiawthooh ko wa ki jaitbru ka North East toh kiwa khian paaid ha waroh ki liang nadooh ka dustur riti kamjooh ka niam ka rukom.
Da ong u leh wa da chem chitom ko hei psiah tooh ki baar ri nadooh u snem 1947 hadien wa wan psiah ki nong Bangladesh hadien wa yoh laitlooid ka ri India wei kamjooh heipor ka thma Bangla ha u snem 1971 iwa katni da yoo yeiwa long i man ka jylla Tripura heiwa ki tre chnong da man ki kiwa khian paaid.
Da ong u leh waka sorkar toh u kheiñ ko yei ku i boon bru haka 10 snem hapoh ka Meghalaya iwa da poi hadooh 28% iwa man na i daw wa joor i psiah tooh ki bru na Bangladesh. Kamjooh ka CAB daw tynyap ko yaka Assam Accord kawa da yasoi ha u 1985 deiwa booh ya u snem 1971 kam u snem wa khadooh kiwa psiah chapoh ka ri kiwa ye wow man kam ki tre ri.
Da pyntip u leh wa hanlada ka sorkar pyrdi da kular ko wa ki jylla ka North East kiwa em yaka Eastern Bengal Frontier Regulation, 1873 waka Sixth Schedule ym chah ktah ko haka CAB, da ong u lada chah ktah kawi ka jylla daw chah ktah lang waroh kiwi ki jylla.
Kamtæ da ong u wa heithaw ka CAB, ka sorkar toh u pynkrehkaam ko yaka ILP ha waroh ki jylla ka North East wei wow pyllait yaka North East naka Indo Nepal Treaty of Friendship, 1950 wei wow pynkrehkaam yaka NRC ha waroh ki jylla ka North East deiwa booh ya u jar jiar u snem ya kiwa ye u kheiñ kam ki tre ri ya ki baar ri iwa chong hei emkaam jar jiar ki jylla.
Discussion about this post