U MP ka Shillong, u Dr. Ricky AJ Syngkon da thoh u cha u Bhupender Yadav uwa man kam u Montri ka sorkar pyrdi uwa pait ya ka Environment, Forest and Climate Change yow pyndam noh chisiendon ya ka Environmental Clearance yong ka Shree Cement wa da thmu wow chna ha chnong Daistong hei thaw wa heh kamwa 25.08 Hectare.
Ha ka chithi da ong wa ha East Jaiñtia Hills District da em boon tylli ki karkhana pynmih Cement kiwa da ktah ya ka la’ær, ka umdih, ki wah deilang ki khloo ki kjam wei u e bor khlem da pynyoo wym chah ktah toh ka wym ye u pdiang.
Chooh chooh da ong wa kiwa chong chnong da chah khang ki wow lai chimbynta ha ka Public Hearing heiwa da chah maham wei ym em da man ko kawa laitlooid wei deiwa leh kamni ym em de khooid i rukom e ya ka Environmental Clearance.
Da kdaw leh wa ka Meghalaya toh kawa em hapoh ka Sixth Schedule najrong leh wa em ka aiñ Meghalaya Transfer of Land (Regulation) Act, 1971 wei hawa e kti yei thaw daw hap wow pait ya kawi pa kawi ka kyndon ka aiñ chwa wow pynyieñ ya ka karkhana.
Najrong kini da kdaw leh ya ka Article 21 ka Constitution kawa da ong wa hap wow yada yei khih i khan ki bru kamjooh i hok ki wow im.
Kamtæ da kyntu ya u Montri ka sorkar pyrdi wow leh da ka Independent Review yei rukom pynman Public Hearing, ka Environmental Impact Assesment wa lada bood ya ki aiñ wow yada ya ki jaitbru ri-loom.
Discussion about this post