Jowai: Ka Shangpung College ynne ka sngi da pdiang ko yei dawa ka Synjuk Rangbah Shnong Thadmuthlong Pyllun (SRSTP) wow pynkylla ya ka thaw wa em kani ka thaw puræ (Address) na ka Shangpung College cha ka Shangpung College Nongrim Thadmuthlong-A katkam ka NOC wa da chim ki chwa wow sdang ya ka.
Ini i dawa yong ka Synjuk da man kaam i hadien wa chimkhia u L.T. Tariang uwa man kam u Block Development Officer C&RD Block Laskein ya i dawa ka Thadmuthlong kiwa da khang tylla ya kani ka thaw puræ ha kani ka 6 tarik uni u bnai hadein wa ym em u mih i pyrtuid ka Thadmuthlong ‘A’ ha ka thaw (Address) wa em ka Shangpung College.
Neiliang u Tariang ha ka 12 tarik uni u bnai da khut u da ka Joint Meeting hapyrdi kiwa pyllai kani ka thaw puræ wa ka Synjuk Rangbah Shnong Thadmuthlong Pyllun ha kamra krehkaam yong oo wow pynbait ya i awri awra wa mih hei yatoh wa kani ka thaw.
Hadien kani ka yalang pyn arliang da hun ki wow pynkylla ya ka Address yong ka Shangpung College na ka Shangpung College cha ka Nongrim Thadmuthlong-A katkam ka NOC.
Da yaklam sñiawthooh leh hapyrdi ki paaid wa chong chnong wa ymhoi u mih i awri awra hei yatoh wa ini khnang wow ye u pynku ya i puræ puthi hapoh kani ka thaiñ.
Ki dkhot ka Governing Body yong ka Shangpung College kiwa da wan mihkhmat ha kani ka yalang kynthup ki ya u Arta Langbang, u Heimon Iakai, u Meker Wann, u D. Chulet katwa ki dkhot yong ka Synjuk Rangbah Shnong Thadmuthlong Pyllun kiwa wan mihkhmat ha kani ka yalang kynthup ki ya u Ioohimi Suchiang uwa man leh kam u President, u Eimi Lyngdoh Secretary, u Anthony Lyngdoh uwa man kam u Waheh Chnong ka Thadmuthlong-A, u Ioophi Lyngdoh kam u Waheh Chnong ka Thadmuthlong-C, u Juhhi Paia Suchiang u Waheh Chnong ka Thadmuthlong-B wa u Niwanki Suchiang u Waheh Chnong ka Muthlong Rim.
Also Read: Chah khang tylla ka Shangpung College ha ka SRSTP
Discussion about this post