Hadien wa mih i awri wei chah pyndik ki paidbah ka chnong Lapangap ha ki Karbi heipor wa ah kba, ini da wanrah i yei sñiawsih ya kiwa boon neibhah wa u kba da man uwa ih wei uwa da khariah.
Ynne ka sngi ki MDC ka VPP hapoh i yahkhmat u Leader of Opposition, u Andrew Shullai da ong u wa da dap ki dei sñiawkhia yeiwa jia heitai khamtam wow sñiaw yei klam u Chief Minister wa ong wow sangeh chwa ki paidbah ka Lapangap wow ah kba deiwa beiñ ya kini ki kyntien u Chief Minister.
Da ong u wa heipor wa thung wei wær ym em wa awri wei weileh wa jia kamni heipor wa ah ya u kba.
Chooh chooh u Andrew da beiñ u yeiwa klam u CEM ka KAAC uwa da kam wa ka Block I wa Block II haap ko cha Karbi Anglong tangwa katkam ka parom kini ki chnong em ki hapoh ka Hima Jaiñtia hadooh kini ki sngi wot ka chnong Tahpat leh kamjooh.
U Andrew da kylli u leh deiyi u baam ki paidbah ha u snem wow wan lada ym yoh ki wow ah kba neibhah wa katkam wa man katni da em ki khynnah kiwa da hap liwan chnong nei puræ cha khapsor neidaw wym ye de ki bei ki pa u kyrchaan ya ki.
Kamtæ ka VPP da thoh ko cha u CEM ka JHADC wow pynman ya ka Special Session namo ka dorbar wa kyrpang wut-wut hapoh ka Council wow yaklam hajrong ini i kaam.
Heijooh i por da ong u wa lada u Chief Minister ym chah u wow lai ah kba, emkaam wow su ya ka bai lutsan cha ki manyung wa chah ktah.
Neiliang u Jamshaphrang Pohtam da ong u wa i pynkrehkaam ya ka Curfew ha katai ka thaaiñ da ktah i ya ki paidbah, wei u khoo u kba toh uwa pynim ya ki bru ymtoh kam ka poisa kawa yoh u booh chwa ha Bank neitæ sai won hadien.
Da ong u wa ka sorkar jylla ong ko wa man ko ka sorkar kawa khlan kawa em 51 ngut ki MLA tangwa lada ha ka watur won tieñ ki tæ pynyoo wa kani ka sorkar toh kawa kob sarong kawa da sepai næ kawa da Fail.
Discussion about this post