Ka War Titan CC da jop ko da 2 Wicket ya ka Tympang CC ha ka yalehke ynne ka sngi yong ka District Cricket League 2026 wa pynlai da ka West Jaiñtia Hills District Cricket Association.
Ya ka kylla-khlem da jop da ka War Titan CC kawa da jied wow kawang bol nyngkong. Ka Tympang hawa lai Bat nyngkong da kamai ko 134 Run deiwa haap lut ko waroh ki Wicket ha ki 27.4 Over. Na kiwa Bat yong ka da em 4 ngut kiwa yoh nod wa 4 ngut kiwa yoh ar dak. U Manhame Lyngdoh da kamai u 17 Run katwa u Paul Andy Passah wa u Wallambok Nongkhlaw da dat ki mar 14 Run samen ki.
Na kiwa kawang bol ka War Titan, u Seintremi Rongngi, u Kermi U Tariang, u Daman I Mahrhen Pohktai wa u Habanjop Khonglah da yoh ki u pynhaap mar 2 Wicket samen.
Hawa beh ya ka thong, ka War Titan da ye ko u pynjop deiwa kamai 135 Run na ki 29.1 Over deiwa dooh 8 Wicket. Napyrdi kiwa Bat da em 3 ngut kiwa yoh nod wa 4 ngut kiwa ye u kamai rap boon kitæ u Lestarket Kassar uwa yoh 28 Run na ki 44 bol wa kynthup ya 5 tylli ki 4 Run, u Baiaithrang Khonglah won da kamai u 22 Run khlem haap na ki 31 bol wa kynthup ya kawi ka 6 Run wa kawi ka 4 Run.
Na kiwa kawang bol yong ka Tympang, u Wallambok Nongkhlaw wa u Damonmitre Phawa da yoh ki u pynhaap mar 3 Wicket samen ki na ki 7 Over.
Yei naam Man of the Match da yoh rah da u Lestarket Kassar uwa yalehke ka War Titan CC.
Ka yalehke ha ka 5 tarik toh hapyrdi ka Mowkaiaw CYC pyrchah ya ka Wahiajer SC heipor 9:00 waje i step. Ya ka Digital Live Score yong kani ka League ye phi u pait ha https://cricheroes.com/tournament/1881561/wjhdca-district-cricket-league-2026/matches/live-matches.
Discussion about this post