Ka mukotduma PIL wa da yaleh da u (L) Kynjaimon Amse heiyatoh wa i bynta u NH-6 na Jowai cha Ratacherra uwa jrong 102.255 Km, da chong bichaar biang da ka Meghalaya High Court ynnin ka sngi.
Neiliang ka High Court dadep thung ko da u Suraj Panthi, Advocate kam u Amicus Curiae wei da wan lai pait u ya ki bynta uni u sarokbah. Ha ka Report wa da wan e u kawa da sooh lang wa ki dur, da pynyoo wa em ki bynta wa da sih bha u sarok hadooh wym hoi de u lai ki kari. Tangwa kani ka Report ym em da ong ko thij heiwon kini ki bynta.
Ini da e laad ko ya u muktiar ka NHAI, u S. Sengupta wow ong wa lada ye u Amicus Curiae wow khana thij heiwon i thaw wa pynyoo u wa sih bha, daw phah u ya ka NHAI wow leh ki wut-wut yeiwa emkaam.
Kamtæ da phah ya u Amicus Curiae wow pyntip u cha ka NHAI ha iwon ini i thaw wa sih wei katwon jrong i thaw wa sih.
Katkam wa da hukum, ka NHAI leh da wanrah ko ya ka Report heiwa da pynyoo ki katwon wa da pynchna pynmiat ya u sarok wei da ong wa i bynta wa sih wa da kdaw u Amicus Curiae toh iwa jrong kamwa 45 Km na u 102.255 Km wei i bynta wa sih bha u sarok toh iwa jrong kamwa 5 Km heiwa 2 Km toh iwa dadep pynchna pynchkeh deiwa siang psiang leh wei najrong ini da chna leh 7 Km ki dooid wei ki dooid wa da sih wa jrong 5 Km dang pynchna ki.
Neiliang ka yung bichaar da ong ko wa ym em artatien ko wa ka NHAI ym bood ko ya ka hukum tangwa da ong wa i kreh toh iwa suki bha wei toh u pyndep u pynchna smat ya ini i bynta wa sih bha iwa 5 Km hapoh ar bnai wei hapoh ar tayaaw nadooh wa pynmih ya kani ka hukum toh u kreh yow lait ki kari tang u lai wei uwa sah uwa 45 Km toh u pyndep chwa u poi biang i por slap iwa mut hapoh 5 bnai wei toh u chna leh heitæ i rukom wym ye u slap wow pynsih ya u sarok.
Discussion about this post