Ka Free Health Camp wa chi sngi wa pynman da u MDC ka Jowai North u Awhai Andrew Shullai ynne ka sngi ha Community Hall ka Lion Mission Compound Dorbar Chnong, Jowai da em duna 300 ngut ki paidbah na kylleiñ ka chnong Jowai kamjooh leh kiwa na baar wa da wan wow phah pait phah sylli yei chait i khiah yong ki ha ki Doctor Specialist waphær waphær kiwa da wan napoh ka Down Town Hospital Guwahati wa kynthup ki Doctor yong Medicine, Cardiology, Gynaecology, Orthopaedic, Neurosurgery wa Paediatric.
Ki paidbah da yoh haroh ki i leh Test mynkna heiyatoh wa ka BP, BMI, RBS wa ECG.
Hei yaklam wa u Awhai Andrew Shullai, ong u kam uwa mihkhmat paidbah i daw wa pynman ya oo u chim ya kani ka laad toh wa sñiawthooh u i chait i khiah toh iwa emkam tam hei im ki bru, wei hawa yachem wa ki lok ki jor chawah chaneiñ leh nyngkong hi da kylli chwa ki yei chait i khiah.
Kamtæ poi i pyrkhat u wow yaklam wa ka Down Town Hospital neibynta u pynman ya kani ka Free Health Camp yow yoh ki paidbah u phah li pait li sylli yei chait i khiah yong ki khnang yow tipsap ki u syndong neibhah lym yoh ki yei chait i khiah hei im man i wym myntoi iyi iyi leh.
Heijooh i por leh ong u i ye u wanrah pynjan ya kani ka Health Camp lyngba ka Down Town Hospital Guwahati ha Jowai man i i myntoi wa khroo ya ki manbei manpa wym yoh laad namo kiwa sñiaw saja u lai cha jngai neidaw wym yoh por næ wym em wa yah ki.
Wei khamtam ya kitu wa jooh lai thooh dawai ha kani ka Hospital, kani ka sngi man ko leh kam ka laad ya kiwa da toh por wow phah sylli yei chait i khiah yong ki.
Chooh chooh da pyntip u wa kiwa wan Check Up ynne ka sngi yoh lang ki leh ya ka Discount Card kamwa 10% wa daw e kani ka Hospital ya ki lada lai chah sumaar ki ha kani ka Hospital.
Discussion about this post