Ka Synjuk Waheh Chnong Jowai, ynnin hei lai yaklam wa u Deputy Commissioner ka West Jaiñtia Hills District, u B.S. Sohliya heiyatoh wa i chah ktah ka Wah Myntdu ha ki jakhlia jakhlait wa ki tngit ki tngar wa wan ha ka hadooh wa da sih ka umkor wa poi na ka chnat PHE, da yoh yei kular na u DC wow pyndooh ya ini waroh heiwa da e yaroh haroh u ya ka synjuk wa chimkhia ya ki kaam wow pynmyntoi ya ka chnong Jowai hi waroh kawi wei wow pynkhooid leh ya waroh iwa da pyntngit. Da ong haroh u wa da pynmih ya ka hukum yow khang yei chna sarok kat wym pu ye u khlanglaad yei tooid khyndaw cha ka wah kamjooh wow pynkhooid ya ini waroh wei da khang leh yei tih moo, tih chyiap, i sait that, sait kari wei noh jhep cha ka wah.
Neiliang ka synjuk da e khublei ko ya u DC yei sñiawthooh u yeini i eh ki paidbah wei yeiwa da leh u katkam wa da kular u.
Ka synjuk da ong ko wa da chimkhia ko yeini neibynta i bhalang kiwa chong wa sah hapoh ka chnong Jowai, ymtoh du kat ya ki tre chnong tangwa ya kiwi tawon leh.
Kamtæ da kyntu leh ya ki bor District waroh kawi wow sñiawbha ki u pynkrehkam ya kani ka hukum neibynta i myntoi ka chnong Jowai hi waroh kawi. Chooh chooh ka synjuk khut ko ya waroh kiwa najan na jngai wa kiwa em hapoh ka chnong Jowai wow em ya itæ i mynsien, u thoohlaad i kammon u pynkhooid ya ka Wah Myntdu.
Da kyntu haroh wow dam u noh khiar yei jakhlia jakhlait, ki jhep ki jhar kat cha wa yoh neibhah kani leh man ko kawi wow pynsih manda kai cha ki wah, heijooh i por pyn yoosih ko ya ka chnong ka thaw.
“To u man i kiwa tip u lehkhooid nadooh yung hadooh cha lait, ha waroh ki talawiar soodong sookun, kam wow yarap leh ya ki bor wa toh u pait yeini,” pynkut ka Wyrta na ka synjuk.
Discussion about this post