Ynne ka sngi da pynman ya ka yalang ha Mawpdang, Mawkhanu, Shillong heiwa ka New Shillong Township Development Agency da e kti ko ya i thaw neibynta yow booh yaka National Law University Meghalaya waka Meghalaya State Judicial Academy deiwa emlang u Montri Rangbah ka jylla, u Conrad K Sangma wa u Chief Justice ka High Court Meghalaya uwa man leh u Chancellor ka National Law University, Meghalaya, u Sanjib Banerjee.
Ha kani ka sngi da emlang ka Montri ka chnat aiñ ka Ampareen Lyngdoh wa u Montri i puræ puthi u Rakkam A Sangma.
U Conrad K Sangma hawa e yei klam da ong u wa ka sorkar da che bha ko ya ka thong wow pynman yaka jylla kawa da ku hei yoh i laa napyrdi ki jylla ka ri kawa man kam ka jylla wa ye u pynmih spah heithaw wow khloh donhi yei spah.
“Yow ye u leh yeini toh u ye u kyntu kynrong ya kiwa chong chnong yow pynkupbor ya ki yow ye ki wow pynku ya ka jylla wei ka sorkar da wanrah ko ya chiboon neibynta ka mynried wa bha ka jylla,” da ong u Conrad.
Da ong u leh wa ka India man ko ka ri wa dang thymme lada nujor wa kiwi ki, kamtæ da emkaam wa waroh ki khynroo wow chakri ki ya i bha i miat ka ri.
U Conrad da kdaw u leh ya ki kaam wa ka sorkar da leh ko hei wow pynku ya i puræ puthi kiwa heh kyrdan.
Neiliang u Chief Justice da ong u wa man i krehkaam wow lai luti ha ki bynta waphær yow yoh yei stat ym du wow puræ donhi na ki kot.
Chooh chooh da ong u wa kwah u wa kani ka skurbah u man ko ka thaw puræ wow yoh ki yei hikai wa paka.
Da kyrmen u leh wa kani ka skurbah daw pynmyntoi ko ya ki khynnah na ka jylla deiwa kyntu leh ya ki paidbah wow embynta ki wow pynku ya ka National Law University Meghalaya wei u man ko ka nongmuna ya kiwi ki ri ka pyrthai.
Ha kani ka sngi da emlang ki sahep ka High Court Meghalaya, u Vice Chancellor ka National Law University, Meghalaya, u Professor Indrajit Dube, u Secretary ka Law Department, u CV Diengdoh wa u Member Secretary, New Shillong Township Development Agency, u E. Kharmalki.
Discussion about this post