Jowai: Ka seiñ Khasi Jaiñtia National Union (KJNU) seiñbei, haka kyrwoh wa da phah da u President ka seiñ u Niman Shadap, da ong wa ka KJNU hadien wa da dep pyrkhat sani wei bichaar bniah bha da chim ko ya i rai wow e yei kyrchaan wa pura ya ka Confedertation of Meghalaya Social Organisation (CoMSO) wa kiwi de ki seiñ kiwa embynta wow dawa pynkrehkaam næ wow pynyoh noh ya ka Inner Line Permit (ILP) hapoh ka jylla.
U Shadap da ong u wa ka seiñ da e ko yei kyrchaan wei yaroh yaka CoMSO kawa yahkhmat da u Robertjune Kharjarin, President HYC uwa man u Chairman ka CoMSO wow dawa pynkrehkaam noh ya ka ILP hapoh ka jylla.
Neiliang ka seiñ da e khublei wei yaroh leh ya waroh ki 60 ngut ki MLA yong ka jylla Meghalaya wa da pdiang wei mynjur ki ya ka ILP hapoh ka yung chna aiñ yong ka jylla. Kamtæ neiliang u President ka KJNU da kyntu u ya kitai ki 60 ngut ki MLA wa kamwa da dep pdiang hapoh ka dorbar wow pynkrehkaam ya ka ILP, toh u booddien ki ya kani ka kaam, khnang wow pynkrehkaam næ pynyoh noh ya ka ILP, kamwa wa ki da chah jied ne chah pynkupbor wow man kiwa yahkhmat wa kiwa chna aiñ yong ka jylla.
Ka seiñ da e khublei ko leh ya ka sorkar MDA hapoh i yahkhmat u Conrad K Samgma, uwa lai chi lai cha nongbah Delhi wow yaklam ya ka ILP, ka seiñ ka ngait skem ko wa i lai Delhi yong u montri rangbah daw man ko kawa mihsoh wei mankaam ko katkam i thrang yong ki seiñbhalang wa ka jylla hi waroh kawi.
Neiliang ka seiñ sa chisien da khut da wer ko ya waroh nadooh ki seiñ wa kreh monsñiawbha, ki khynroo, ki manbei manpa wa kiwi wa ym toh wow em ki yei sñiaw yaphær wei wow em i mynsiem yatylli neibynta i daw bah daw san yong ka jaitbru kat wym pu sep ka sngi, neibhah lada ym yatylli daw chah yoohroit ha ki poi ei wei i daw man bro i ha kawi ka sngi.