Ka Meghalaya Cricket Association da pynbna ko wa daw e ko ya ka Scholarship ya u Everbloom Nongrum, u khynnah uwa naka chnong Mawryngkneng uwa da yoh ya ka Jeevan Raksha Padak Award na u President ka India yei kaam chlur wow pynlait ya ki arngut ki lok ha ki arsien iwa jia.
Uni u khynnah toh uwa yaleh Cricket ya ka East Khasi Hills Cricket Association.
U Everbloom toh uwa da yarap u ya ki ar ngut ki lok yong oo nei ngam-um iwa da jia ha u 2019 ha Mawryngkneng C&RD Block.
Kini ki lok yong oo kynthup ki ya u Davin Sohtun (9 snem) uwa sah ha Mawryngkneng (Main Road) wei puræ u ha Class 3 ha Radiant Adventist Secondary wei heipor wa yalehke u ha i thaw wa dang chna yung (Construction Site) ha Mawryngkneng C&RD Block, da ngam u ha iwi i thlu iwa da ieh khlem tymmoh iwa dap um heiwa u David da kbai u wow paan yarap na kiwi tawon ki bru heiwa u Everbloom uwa dang 10 snem ha itu i por u khon ka Banrikerlin Nongrum na Mawryngkneng Main Road wei puræ u ha Class VI ha Mawryngkneng Higher Secondary School da lai u cha ini i thaw wei da hiar u ha ini i thlu wow pynlait ya uni u khynnah.
Ha ka 23 Naiynñiaw nawon yong 2019 ha ini i jooh i thaw u Wanphai Rani uwa dang 8 snem u khon ka Rihunlang Rani na Mawryngkneng (Main Road) uwa puræ Class 3 ha Radiant Adventist Secondary School Mawryngkneng heipor wa laike u wa ki lok yong oo da liat u ha ini i jooh i thlu wei ha kani ka kynti leh u Everbloom da kynthiar u ha ini i thlu wow pynlait-im u sa uni uwi u khynnah.
Yeini i pynbna ka MCA toh iwa da leh ha ka Final ka East Khasi Hills Cricket Association District League T20 Tournament, kawa da pynman ha Mawryngkneng ynnin ka 4 tarik.
U MCA Honorary Secretary Gideon Kharkongor wa MCA Honorary Treasurer, u Dhrubajyoti Thakuria da emlang ki ha kani ka sngi.
