Jowai : Ki khon ka Balang Seventh Day Adventist Church, Ladthadlaboh dei mynsien wa sñiawkhia wow e i yarap cha kiwi ki bru da pynman ki dei e snaam sñiawbha ynne ka sngi ha Blood Bank, Jowai hapoh i yahkhmat u Rev. R. Wallang.
Ha kani ka sngi da wan hadooh ynru ngut kiwa kynthup ya san ngut ki chynrang wa kawi ka kynthai.
Hachwa wow e snaam ki da em i batai wei sylli yaki næ kawa da khut kamka counselling yaki.
Na kini ki ynru ngut da ye u e snaam du soo ngut donhi wei da pyntip leh wa neini chakhmat daw wan e snaam sñiawbha biang ki wei daw leh yeini hadooh kamwa le sien chi snem.
Kani man ko ka sien wa nyngkong ya kani ka Balang Seventh Day Adventist Church, Ladthadlaboh u wan e snaam sñiawbha kamni katwa kiwi ki khon ka Balang cha kiwi ki bynta ka ri-loom Jaiñtia jooh e snaam sñiawbha ki dei langer kam haka sngi Global Youth Day.
Katwon man i iwa yoosuk u sakhi yei em mynsien e yarap ki bru katni neibhah lada wyrchaw kam ha kini kipor wada dep niaar bha u wan e snaam ki bru wei boonsien ka Blood Bank man ko kawa emkaam snaam.
Hei yaklam wa u Rev. R Wallang da ong u wa man i iwa eh bha u pynsñiawthooh yaki bru yei emkaam u e snaam neibhah wa jooh sñiawthooh bakla baitki heiyatoh weini, katwa kamtæ ini i leh ka balang yooluti u man i kam ka nongmuna ya kiwi tawan wow bood yakani ka luti.
Ha kani ka sngi leh da wan esnam sa u SP ka West Jaiñtia Hills u R. Muthu.
Discussion about this post