Shillong : Heiyatoh waka mukotduma na kawi kawa mihkhmat yongki seiñbhalang ka President ka CSWO ka kong Agnes Kharshiing heiwa da kynnoh ko wa hapoh ka jylla Meghalaya kiwa ksohkaam kam u MLA wa MDC da tyngkheiñ ki yei riti synchaar ka ri India.
Kani ka mukotduma da e ka kong Agnes Kharshiing ha Meghalaya High Court ha u Naichiphaw 2014 wei hadien ini da chna pynmiat (amendment bill) ka sorkar Meghalaya yaka aiñ Prevention of Disqualification (Members of the Legislative Assembly of Meghalaya) ha u Ñaikhynde 2015 yow pynduh (disqualify) ya ki MLA wa man leh kam ki MDC.
Heiyatoh weini hadooh 7 ngut ki MLA kamjooh kiwa da ksoh yei kyrdan MDC da hiar chuki ki katwa u PM Syiem da yieñ skem u khlem hiar na pynar ki kyrdan wei katni man u kam u CEM ka KHADC.
Neiliang ka yung bichaar da phah dorkhat ko cha u lat ka jylla wow kylli na oo kammon pyrkhat u heiyatoh weini, hadien dei yong bnai u neiliang u lat ka jylla da kylli noh u naka Election Commission of India heiyatoh weini.
Ynnin ka 31 tarik u Ñaisan 2016 ka hukum na u lat ka jylla da ong ko wa da bichaar ya ini i kaam katkam ka kyndon Article 191 (1) (a) yongka riti synchaar ka ri wa kdaw yaka nongrim wow pyndooh (disqualify) yaki MLA.
Haka hukum da ong leh wa katkam ka Article 192 (2) da kdaw wa kam kini ki kaam hachwa wow rai, u lat ka jylla haap yoh yei rai naka Election Commission of India.
Ka Election Commission haka chithi wa em u Letter No. 113/7(G)/ML/2015-RCC/398 dated 16 May, 2016 da pyntip ko wa u PM Syiem, ymem u ksoh u yei kaam myntoi (Office of Profit) yongka sorkar katkam ka kyndon aiñ Article 191(1)(a) ka Constitution ka ri.
Katwa kamtæ u lat da rai u haka nongrim yong kani ka chithi naka Election Commission wa u PM Syiem ye u, u ksoh ya pynar tylli ki kyrdan kam u MLA wa MDC.
Discussion about this post