Jowai: Ki 6 ngut chipayu wa chong wa sah ha Khliehiongriang, Jowai; ki khon yong u Heimon Hinge waka Sonita Siangshai da e yarap sñiawbha ki da u khoo wa mar 25 kg deilang wa u dai cha ki 25 tylli ki manyung wa dooh wa duk yong ka dong Khliehiongriang haka yalang tbian wada pynman ynne ka sngi ha Community Hall ka dong.
Ha kani ka yalang da emlang nadooh u waheh chnong u Carelang Ladia, uwa da pynsñiaw leh yei kmen wa hakam kini i por waki paaid wa chong chnong maad ki yei jynjar i saja neidaw wym yoh de ki u likhih likhan khamtam kitu kiwa likhih sngi te baam hei miet, kattu la le sien wan i yarap chaki wa kani sien wa yoh yarap ki, heiwa nyngkong da yoh yarap ki na u MLA u Wailadmiki Shylla, wa ar won naka Shiv Mandir Committee Jowai.
Da yoh leh i klam sñiawngooh na u P. Laloo Treasurer ka dong, i ngoohblai na u Adviser u H. Sutnga katwa i klam e khublei won na u Assitant waheh chnong u Pilar Tron.
Kini ki 6 ngut chipayu kynthup ya u Heinidao Siangshai, u Samhao Siangshai, u Marleki Siangshai, ka Arnika Siangshai, ka Alicia Siangshai waka Banita Siangshai.
Discussion about this post