July 29, 2021
Advertisement
Advertisement
U montri ha ka sorkar jylla uwa man leh u MLA ka NPP na Mawhati, u Dasakhiatbha Lamare da beiñ joor u ya i leh embor wei kam pood yong ka sorkar Assam ha ka chnong Iongkhuli, Ri-Bhoi District. Da ong u wa kam ha ini i jia ym jooh em jia ha ka thaaiñ Ri-Bhoi, deiwa pynsñiaw wa kam u MLA uwa mihkhmat ya ka Constituency wa haap hapoh i kajia pood (Block-II), ki pulit Assam jooh lai pait ki ya ki kaam pynroi wa khian, tangwa ym jooh em i huri hura neibhah wa em i yaklam sñiawthooh na waroh arliang.
Da pynsñiaw u leh yei kyrmen wa i yaklam hapyrdi ki ar ngut ki Montri Rangbah, ka jylla Assam wa Meghalaya daw ye ko wow pynbait noh ya u pood u ang ha ki kajiak bnai wow wan hanla ym em yooluti wa daw ye u pynbait syndon waroh i eh yong ki khappood.
Advertisement
U Lamare da ong u wa ki paidbah ym toh wow sñiawthooh bakla ki ya i phah pulit cha khappood, neibhah wa i phah ya ki pulit u man ko wow yada waroh arliang ym da iwi won i thmu næ wow yakhun ya ki paidbah ha Meghalaya.
U Montri da kyntu u leh ya ki paidbah ha ki thaw khappood wow pynneh ya i suk i saaiñ ym toh wow pynmih kulmar. Da ong u wa i jia kajia ha khappood ym toh du neidaw yong ki sorkar jylla, tangwa i wym ya sñiawthooh da mih na ki daw yong kiwa chong chnong wei iyi wa jia ha ki khappood ym toh wow pynbaad du ya ka sorkar.
