U Deputy Chief Executive Member ka KHADC, u Pynshngaiñ N Syiem da ong u wa em kiwa yahkhmat seiñ saiñpyrthai namo ki Politician kiwa ong wa emkaam du ya ka sorkar jylla, ki bor District, ki Block Officer wa ki chnong, deiwa pyndooh noh ya ka District Council, ki Hima wa ki Raij.
Yeini u Pynshngaiñ da ong u hawa klam ha ka yalang wow pynkhlan ya waroh ki Hima hapoh ka Synjuk ki Hima Khasi (Federation of Khasi State), kawa da man ynne ka sngi ha Khasi National Dorbar Hall, Mawkhar.
Hawa kylli hajrong ini i klam u, u Pynshngaiñ deiwa khlem da jer pyrtuid, da ong u wa yoh sñiaw u wa em kiwa yahkhmat seiñ saiñpyrthai, kiwa da pynsñiaw wa i rukom krehkaam da ka sorkar jylla ym kwah ki wow em ka District Council, ki Hima wa ki Raij tangwa kwah bait wow em du ka sorkar, ka yung krehkaam ki Deputy Commissioner, ka yung krehkaam u BDO wa ki chnong.
U Pynshngaiñ uwa man leh kam u MDC ka Congress, da ong u wa ini ym ye wow man neibhah iyi wa da seiñdur waroh chi kattu toh u neh wei wow skem deiwa ya krehlang ka sorkar wa ki District Council kamjooh ki Hima, ki Raij wa ki chnong, wei emkaam wow pynskem chooh chooh ya ini wa da em.
Discussion about this post