Ynne ka sngi ha ka yalang wa da pynman ha Mawphlang, neiliang u President wa khliehdooh ka NPP uwa man leh u Montri Rangbah ka jylla, u Conrad K Sangma da ong u wa da em i por wa ka NPP em ko du 2 ngut ki MLA wei hapoh 8 snem ka NPP da yoh ko ya ki MLA ha Arunachal, ha Manipur wei da em leh ki Montri ha ki sorkar jylla wei ha Nagaland leh da em ki MLA, katwa ha Meghalaya ka NPP da yahkhmat ko ya ka sorkar wei ini toh nei chaniah ki paidbah neibhah wa ka Party da booh ko haphrang dooh ya i bha i miat yong ki paidbah ka thaaiñ mihsngi (Northeast) wei heipor wa tbian ka NPP da ye ko wow kynjoh cha ka kyrdan wa kiwi slem ki wow yoh ya i kyrdan kam ka National Party, hanla man ko ka National Party tangwa da booh ko ya ka thaaiñ mihsngi haphrang dooh.
Da ong u wa ha ki le snem chiteiñ kani ka sorkar da chem ko chiboon i eh i khoo khamtam ha i chongsuk, wei hawa em i maa da yaklam lang wa ki Montri ha ka sorkar, deiwa pynrap wa kini toh ki bru yong i ymtoh kiwa bru wa wan na chiliang pood wei ka sorkar da rai ko wa ymtoh u leh iwon iwon wow wanrah hei maa ya kiwa chong chnong.
Chooh chooh da ong u wa ha waroh i jia ki paidbah da yoo ki wa ym em iwon iwon i dooh ya ki mynsien bru neibhah wa ka sorkar da kheiñkor ko ya waroh ki bru.
U Conrad da ong u leh wa ynnin ka sngi da em i jia wa eh heiwa da thmu wow leh ya ki kaam damok ya ka NPP chi sngi chwa wow psiah u Lamphrang Blah, wei da kylli u weileh tieñ ki mo wa ka NPP daw khlan chooh ko neipor cheipor, wei da pynrap u leh wa u Blai rap tip u yeini.
Da kyntu u leh ya kiwa kyrchaan ka Party wow man kiwa khlan wei ymtoh kiwa pyndem hakhmat i eh wa i pyntieñ yongyi yongyi.
Ha kani ka sngi yalang da yoh leh ya i klam na u Sniawbhalang Dhar, u Rowell Lyngdoh uwa man leh kam u Symbood Montri Rangbah warim wa kiwi kiwi.
