Ka National People’s Party ynne hawa pynbna yei pyrtuid ki 58 ngut ki kyrtong neibynta kani ka Election MLA 2023 ha ka yalang wa da e pyrtuid “Stronger Together” ha madan Polo, Shillong, deiwa emlang u National President ka Party, u Conrad K. Sangma, u National Vice President, u Prestone Tynsong, u National Treasurer, u James K Sangma, ki MP ka Party kitæ ka Agatha K. Sangma wa u Dr. W.R. Kharlukhi; da pynlait leh ya ka kot wa da e pyrtuid “Promises Delivered” namo ki kular wa da pyndep u leh kiwa da kular ha u 2018.
Ha kani ka yalang paidbah wa da wan palat 20,000 ngut ki paidbah, u Conrad da ong u wa ha kini ki 5 snem da boon bha kiwa mihkhmat paidbah kiwa da psiah cha ka NPP iwa da pynkhlan chooh chooh ya ka Party.
Da ong u wa ka NPP da sdang ko ya chiboon ki kreh wei da wanrah ko leh chiboon i kylla hapoh ka jylla hawa kyruiñ dien cha ki 50 snem kiwa da lai hapoh ka jylla wei dei chemphang wei dei chlur da lai chakhmat wow pynbait ya u pood ka jylla wei u pteiñ hadooh wa ye u pyndep ya waroh kiwa dang sah.
“Lada em kawon kawon ka Party kawa ye wow chem ki laad wow pynbait ya u pood, kattæ toh ka NPP wei kular O ya phi wa lada e laad biang ha uni u 2023 daw thooh laad ko wow pynbait ya u pood yow ye ki paidbah wow im hei suk, khamtam kiwa im ha ki thaw khappood,” da ong u Conrad.
Da ong u wa kani ka Election 2023 toh kawa emkaam bha neibhah kattu ka jylla da psiah ko chei rta wa 51 snem, kamtæ da emkaam ya ka Party kawa chynna jngai wow yohlaad u yahkhmat ya ka jylla.
Da kyntu u ya ki paidbah wow kylli ki ya idæ ileh wa emkaam ya ka sorkar wa yahkhmat da kawi ka Party neibhah emkaam wow booh yurim uwa skem neibynta ki 50 snem wa daw wan.
“Nga sñiawskem O wa ki paidbah daw pynyoo ki yei chaniah ha ka NPP sa chisien yow pynyoh yei angnood kamjooh ka Meghalaya wa thymme.”
Da ong u leh wa ka thaaiñ mihsngi daw paitkhmat ki cha ka jylla Meghalaya wei ka NPP toh kawa ye wow pynpoi cha kani ka thong.
Na ki 58 ngut ki kyrtong wa da pynbna, da em leh 10 ngut kiwa da yut na ka Congress wa TMC kiwa da psiah hapoh ka NPP.
