Ynne ka sngi kawa man ka Summer Session ka JHADC wa chi sngi, neiliang u MDC ka VPP na ka Liang Pyrchah, u Jamshaphrang Pohtam da wanrah u ya ka phang yaklam namo ka Motion heiyatoh wow em ka aiñ næ hei thoh i tar ya i rukom im wa kyrpang kamjooh ki chaad niam wa pyndep hapoh u pood ka Council.
Da ong u wa ka jaitbru yong i man ko kawa kyrpang heiwa da em chwa i ngooh i dem chwa wow leh ya iwon iwon i kaam.
U Jamshaphrang da kdaw u wa i rukom im yong i nadooh i chaad i kmen, i put i tem man iwa kyrpang heiwa ka jaitbru hi im ko neiwa burom ya ka mariang wei iwa em ha ka.
Chooh chooh da e khublei u ya kiwa nachwa wa da pynneh ki yeini i rukom im wa kyrpang lyngba i khana pateiñ deiwa ban joor wa ymtoh u pyndooh yeini i rukom im nei khana pateiñ tangwa wot wow pynkhlan wei wow em i hei thoh i tar.
U Jamshaphrang da ong u wa ya kani ka phang da wanrah u khlem iwon iwon i sñiaw ngait niam tangwa i mynsien sñiawkhia yeiwa da jied ki paidbah ya oo wow pynneh pynsah yeiwa emkaam ki.
Da ong u wa katni da em i pynemkaam bakla ya ki chaad tynre heiwa ym em de u bood late ya ki katkam wa toh u man ki, lada toh kiwa pynchong yurim ya i rukom im namo Culture wa i embynta ki chaad wa ka niam.
Da ong u leh wa ha kani ka juk da pynemkaam ya ki riam ki bait kiwa na chiliang duriaw, kiwa ym yahaap de wa i pynman kyrpang ya ki chaad wei rukom im tre yong i.
Hajrong ini da kdaw u ya ki kattu katni ki chaad kiwa emkaam wow lai katkam i rukom im ka jaitbru wei katkam wa yah ka niam, deiwa ban joor wa em ki chaad wa yatoh wa ka niam toh u bood ya ki katkam wa yah ka niam nadooh ki chaad Pastieh, Rongkhli wa kiwi.
Heijooh i por da kdaw u leh yei tyngkhooh wa ka aiñ i rukom im, ki chaad wei lehniam deiwa kdaw wa ka Sixth Schedule e bor ko wow pynneh yei rukom im wa kyrpang ki jaitbru ri-loom, tangwa manda pyrkhat wei ngam yillu bha dang em chiboon ki kaam wa tyngkhooh wa ki aiñ ka sorkar deiwa e nongmuna ya ka Chaad Rongkhli ha Nongtalang heiwa da jooh pyndep ya ka nadooh ki por nachwa deiwa pynchong yurim ya ki aiñ niam (khlem da tynyap khiar ya ki khla ki mrad) tangwa katni da em i tyngkhooh wa ki aiñ sorkar wa pynthut wow pyndep yeini.
Hajrong kini kiyi kiyi waroh da ong u wa da toh i por wa ka JHADC u chimkhia ko wow pyrkhat u em dei thoh wei wow em ki aiñ wow pynneh pynsah ya ini i rukom im wa kyrpang ka jaitbru.
Ya kani ka phang da kyrchaan leh da ki MDC ka Liang Pyrchah nadooh u Rikut Patieñ, u Gresentus Susngi, ka Deiwipaya Tongper wei hadien wa yoh i pynche na u CEM ka JHADC, neiliang u Jamshaphrang da pyndam u ya ka Motion deiwa ban skem wow leh ka Council yeiwa emkaam.
Discussion about this post