Ha ka Motion wa wanrah da ka MDC ka Mynso-Nongjngi Constituency hapoh ka Dorbar Lyiur ka JHADC ynne ka sngi neibynta u yaklam u yatai hajrong i emkaam u pynneh pynsah ya ki um ki wah wei wow yada nei chah leh pynsih, ka Laiawanlamjinghun Khynriam da ong ko kamwa u Blai da kyrkhu kyrpang u ya ka rymaw lyngba ki loom ki wah wa ki mrad ki mreng, tangwa katni da sakhi yei chah leh pynsih deiwa kdaw yei chah ktah ka Wah Lukha, Wah Myntdu, Wah Umngot wa kiwi kiwa man ki wah wa pynmyntoi ya ki paidbah nadooh wow yoh umdih, u rep u riang wei u yoh ya ki dohum.
Da kylli ko leh wa lada ka Council da leh ko mo ya iyi ræ iyi heiyatoh wa ki um ki wah.
Hawa chimbynta u kyrchaan ya kani ka Motion, u Jamshaphrang Pohtam ong u i wan ka roi ka paar kam i chna ya u sarok Shillong-Dawki da man i leh dusmon ka Company chna sarok deiwa pynkai khyndaw chapoh ka Wah Umngot wei da chah ktah leh ka Amlympiang ka wah wa jooh lai khwe dakha bha ki bru, kamtæ da kyntu u wow pyrkhat thymme hajrong kammon u leh yow pynim biang ya ki wah.
Ka Deiwipaya Tongper ong ko wa i chah ktah wei kylla rong ka Wah Lukha ha East Jaiñtia toh i daw na ka Cement Plant kamjooh i yap dakha man-u-snem ha Wah Prang hei bynta khappood ka East Jaiñtia. Kamtæ da kyntu ko wa ka Council ymtoh du kat u dai lilam hi-eh ko ya ki wah tangwa u sumaar u yada ko leh.
Heiyatoh wa ini u EM, u Hambertus Nongtdu pynche u wa ka chnat da thooh bniah ko yei chah leh pynsih ki wah, tangwa neidaw wym pu em ka aiñ wow yada næ pynrkhiñ ya kiwa emkti, dang man iwa eh ya ki. Hanla kattæ leh yooluti u wa deiwa pait bniah biang ka EC ya ka Bill 2023 daw ye wow chna ki aiñ wow kdoh u khoom neibynta u pynrkhiñ yei chah pynsih ki wah hapoh Ri-loom Jaiñtia.
Neitæ da em leh i pynkhreh ka EC ya ka Policy krehkaam hapoh ka chnat Forest lyngba ka India Environment Law Organisation New Delhi yeiwa da mynjur da ka yung dorbar ka Council.
Hadien i jubab u EM yieñ sa u CEM, u Thombor Shiwat wow ong hanla ym em ki ka bor u lai pait lai Test ya ki um ki wah leh, tangwa kam ka Council wa da yoh bor na ka Constitution ka ri India wow pait u yoo ya ki um ki wah neipor cheipor da e dei thoh cha ka Meghalaya State Pollution Control Board kawa em i bor u pait yei khooid i tngit ki wah deilang i dei thoh leh cha ka Company wa chna sarok.
Hawa pdiang wei hun yei pynche u EM wa CEM, ka Laiawanlamjinghun da pyndam noh ko ya ka Motion deiwa kyntu leh ya ka EC u man kawa chimkhia hajrong ini.
Discussion about this post