U Montri Rangbah ka Meghalaya, u Conrad K Sangma ynne da wai u ya ka “CM Elevate” ha Tura, West Garo Hills deiwa khana wa ka sorkar da booh bhah ko Rs. 300 klur yow kyrchaan ya 20,000 ngut ki wow yoh myntoi deiwa seiñ khih.
Da ong u leh wa ka India em ko chiboon bha ki khynroo wei yow pynchlur ya kiwa em hapoh ka jylla wow seiñ khih ki, da sdang da kani ka CM Elevate heiwa daw e Grant hadooh 75% iwa chong katkam iwa emkaam wei katkam ki kyndon ka Scheme.
Kamtæ da pynchlur u ya ki khynroo wow seiñ khih deiwa ye leh wow pynyoh kreh ya kiwi heijooh i por yow em noh katæ ka mynsien wow seiñ kreh hapoh ka jylla.
Da pynkynmoo u leh ya kiwi ki Scheme kiwa da e yarap ka sorkar cha ki khynroo kam ka “Yess Meghalaya” heiwa da em palat 1000 tylli ki seiñ kiwa da yoh myntoi.
Da kdaw u leh ya ka Meghalaya Grassroot Music Programme (MGMP) kawa da yarap ya palat 1500 ngut kiwa rwai wa tem ha ka chi snem wa da lai heiwa da yoh laad kiwa boon wow pynyoo yei sap yong ki.
Ha uni u snem hapoh ka MGMP, ka sorkar daw kynthup lang ko ya ki yalehke Drama, ki khana parom yong rim wa kiwi kiwi de yow pynyoo ya ka dustur riti ka Meghalaya.
Da khana u leh chaphang ka PRIME kawa da e sikai wei e yarap poisa cha kitu ki khynroo kiwa seiñ khih.
Da klam u chaphang i e yarap poisa ka sorkar cha kitu ki chnong kiwa yada wei wow pynneh pynsah ya ka rym-aw wei ha u snem wa dep da pynlait Rs. 30 klur cha kiwa boon ki chnong yow pynheh pynsan ya ki khloo chnong.
Ha kani ka sngi da pynlait ya ka poisa kawa Rs. 1.05 klur cha ki Village Organisation hapoh ka Community Investment Fund wei da e leh Rs. 60,98,595 hapoh ka Payment for Ecosystem Services. Wei hapoh ka Yess Meghalaya da pynlait Rs. 9,30,00 kam ka bhah wa nyngkong waka Rs. 1,40,00 kam ka bhah wa ar cha kiwa yoh myntoi.
Discussion about this post