U MLA ka Congress na Nongthymmai u Charles Pyngrope uwa man leh uwi na kiwa yahkhmat wa da heh ka Party, da pynsñiaw u yei emkaam ya ka Sonia Gandhi, kawa man leh kawa yahkhmat yong ka All India Congress Committee (AICC) wow tuklar hajrong i mih i wym ya sñiawthooh yumut ki dkhot yong ka Party ha ka jylla Meghalaya.
U Charles da ong u wa u man iwa biang lada ka Sonia Gandhi u yachem ko ya waroh kiwa yahkhmat napoh ka Meghalaya, kitæ u Vincent H Pala, uwa dang chimkti ya i kaam President yong ka MPCC wa u Dr. Mukul Sangma uwa man uwa yahkhmat ka CLP wow yaklam wow yatai hajrong ki ujor.
Kam wow kdaw wa ka tyllong khubor da pynyoo ko wa hadien wa thung ya u Vincent H Pala, uwa man u MP ka Shillong kam u President yong ka MPCC, neiliang yong u Dr. Mukul Sangma ym em sñiawsuk u neibhah wa ym em ya syllok lang wa waroh ki bor wa hakhlieh ka seiñ wa oo hajrong ini i kaam.
U MLA ka Congress da ong u wa u rap bha lada waroh ar kini kiwa yahkhmat u yachem ki ya ka President yong ka seiñ ha Delhi yow pynkut noh ya i sñiaw yaphær yumut.
Ha iwi i liang u Charles da kam u wa kam ka Party, ka Congress toh ka yung kawa skem wei ka mynried yong ka leh toh kawa tyrchaaiñ neibhah wa toh ka seiñ kawa ye u chaniah.
Hawa kylli hajrong ka BJP kawa ksoh ya i synchaar ha Delhi wa ha kiwa boon ki jylla, u Charles da ong u wa nadooh u snem 2013 hadooh katni, ym em da yoo yei khlan næ ku ha i boon paaid tangwa i neh i sah kamjooh ym yoo wei la ha ki por wow wan daw ku, tangwa ini toh i kaam Politics wei ym ye wow ong chwa ya iyi iyi.
