U President ka People’s Democratic Front (PDF) uwa man leh u Montri ka sorkar MDA, u Banteidor Lyngdoh da ong u wa neiliang u President wa thymme ka Meghalaya Pradesh Congress Committee (MPCC), u Vincent H Pala da tyrwa u ya oo wow uiñ biang cha ka Party.
Kam wow pynkynmoo heini, u Banteidor chwa wow psiah u cha ka PDF da jooh man u kam u MDC ka Mawkynrew ha u snem 2014 na ka Congress wei toh uwi na kiwa yajan bha wa u Dr. Mukul Sangma.
Hawa klam wa kiwa pathai khubor ynne ka sngi, u Banteidor da ong u wa ha ka saiñ pyrthai em bait i khut wa i tyrwa na kiwi ki Party, wei kamjooh ka PDF leh jooh khut ko wow psiah cha ka Party kamwa leh da kiwi ki Party.
Da ong u wa heiyatoh wa i tyrwa u Vincent, neiliang yong oo ympu em u jubab u iwon iwon tangwa kam u President ka PDF kwah u wow pynkhlan wei wow kyntu kynrong ya ka Party kawa em u katni, tangwa da ong u wa ya i wow wan ymye wow ong chwa neibhah lada em ha kawon kawon ka Party toh neibynta wow chakri ya ki paidbah ha iwa bha tam.
