theme-sticky-logo-alt
theme-logo-alt

Emkti ka seiñ u Bernard Marak wow khrong poisa hadooh wa ku dor ki marbaam ha Tura

U SP ka West Garo Hills District, Tura da pyntip u wa da yoh ya chiboon ki ujor ha kini ki bnai wa dadep na ki paidbah wei kamjooh da mih khubor wa da ku dor ki marbaam nadooh, ki soh, ki jhor, i doh, ki baam dihcha hapoh ka chnong Tura.

Kamtæ hadien wa pynman ya ka takit da chem wa ini i ku dor da ktah joor ko ya ki paidbah wei i daw toh wa em ki bru wa kreh hapoh ka seiñ wa tip kam ka “Meghalaya Chamber of Commerce” kawa da krehkaam hei pait u Bernard N. Marak, MDC ka Tura wa kiwi de ki bru wa kynthup ya u Wilver Dango M. Marak, u Anish M. Sangma, u Patcheng T. Sangma wa kiwi de.

Kani ka seiñ toh kawa khrong poisa chiboon na kiwa dai dukan neibynta ka Membership Fee wa ka Renewal Fee kawa hap pynthymme ki man-u-bnai. Wei kani ka poisa wa da yoh na kini da pynlai cha kini ki bru wa pynlai ya ka.

Ki dkhot kani ka seiñ da maham ki leh ya ki bru wym toh ki jaitbru ri-loom kiwa em dukan, kiwa khayi pateiñ wa hap ki u yoh “No Objection Certificate” na u Bernard N. Marak wei lada ym yoh yeini ym ye ki wow pynthymme ya ka “Trading by Non-Tribal (TNT) License” yong ki.

Ka takit da chem ko wa dadep wow khrong chiboon ka poisa iwa man pyrchah ya ka aiñ, wei hadien wa da chimkhia ki pulit, neiliang ka “Sweets and Confectionaries Association of Tura” da chim rai ki wow pynhiar yei dor ki marbaam ha ki dukan ki da mar chiteiñ wei kini ki dor thymme toh kiwa da krehkaam nadooh ka 22 tarik uni u bnai.

Neiliang ki pulit da pynngat ki ya ki dkhot ka Meghalaya Chamber of Commerce hapoh ki kyndon ka 120B/384/417/419/420/467/468/471 ka IPC wei ka takit dang lai ko chakhmat.

Chooh chooh da pyntip leh wa da em ki bru wa khrong poisa na kiwa man kam ki Supplier yow yoh ki yei yada wei da pynbor leh ya kiwa dai dukan wow thied mar ki na ki bru wa yada ki hei dor wa da booh ki katwa ngiat wei hajrong ini dang pynman ya ka takit wei daw pynchitom ya ki katkam ka aiñ.

Share this:
Previous

Sdang ka lympung yalehbol ka Jingiaseng Samla Nongkhlieh District

Next

Shillong Premier League 2021-22: Jop ka Nagkiew Irat ya ka Langsning