U General Secretary ka United Democratic Party (UDP), u Dr. Jemino Mawthoh da ong u wa na ki dak ki chin kamwa da mih katni, ha Khasi-Jaiñtia Hills ka yakhun Election MLA ha u snem 2023 daw man bait hapyrdi ka UDP waka NPP.
Da ong u wa da che kdar bha wa ka yakhun u man bait ko hapyrdi ka NPP wa ka UDP, tangwa chong won ha ki paidbah, neibhah hanla kini ki ar seiñ ki emlang ki katni ha ka jooh ka sorkar synrop Meghalaya Democratic Alliance (MDA), tangwa hawa lai cha ki paidbah hap ieh hei stat yong ki paidbah ya kiwon u jied ki.
Hawa kylli, u Dr. Jemino uwa man leh kam u MLA warim da ong u wa kiwi ki Party kamwa man katni em ki hei piah wei synjor, deiwa e nongmuna ya ka Congress wa ka BJP ha ka jylla. Hawa yatoh wa ka All India Trinamool Congress (AITC), da ong wa ka Trinamool ym pu ye ko wow soohthied ha ka jylla, neibhah hadooh katni wa dang em du ha West Bengal, boi ye ko u yoh kattu katni ki MLA na Garo Hills, tangwa ha Khasi-Jaiñtia Hills ym pu yoh yei kyrchaan.
Ha iwi i liang, u Mawthoh da ong u wa ka UDP da jooh klam bha ko yei yatylli wa i skem, hanla ka Party ym em yoh ko boon ngut ki MLA ha ka Election 2018, tangwa da ong u wa i emlang won ha ka sorkar synrop, ka UDP leh ka embynta ko wow pynskem ya kani ka sorkar wei wow wanrah ya ka lai bait lai ryntih ha ka synchaar khadar hapoh ka jylla.
Da ong u wa katni da jan dap 5 snem, hanla ka UDP em ko kajiak ngut ki MLA tangwa da pynneh bait ya ka sorkar synrop MDA, wei da pynsñiaw u wa ka Party ym kwah ko wa ka sorkar u khih ko, neibhah lada khih palat ka sorkar, ki kaam pynroi leh ym lai bait lai ryntih wei lada em i skem daw wanrah yei bha ya ka jylla khamtam ha ka roi ka paar. Da ong u leh wa ym du ha ka sorkar, tangwa wot ha ki ar tylli ki District Council dei em ka UDP da ye u pynskem ya ka synchaar khadar.
U Jemino, da ong chooh chooh u wa kam uwa yahkhmat ym ye u wow kam lane ong wa iyi wa da leh da ka sorkar næ da ki District Council toh iwa biang lut, neibhah i emlang wa kiwi ki kynhun leh i jooh hi i thut. Da ong wa neiliang ka UDP barabor ka pyrchang ko wow wanrah ka jooh ka thong neibynta wow pynu ya ka jaitbru.
Uwa yahkhmat ka UDP da ong u leh wa neiliang ka Party hawa yoo ya iwon iwon i duna næ bakla yong ka sorkar, ka Party da kdaw wei pynyoo ko ya iyi wa toh wei hawa yatoh wa i kynrum kynram ha ka chnat MeECL ka Party ka da yieñ skem bait ko wow dawa pynbait.
