Uwi u bru hadien wa chah ujor ha ka kurim wei hadien won chah dat wei chah dawa poisa ha ki pulit, da pynkut u yei mynsien wei ini waroh iwa jia ya oo ym em thoh u ki ha ka chithi kamwa leh kiwi tangwa dei sia rong suiñbneiñ ha ka patlun rong lieh wa sap u.
Ini toh iwa da jia ha Farrukhabad, Uttar Pradesh wei uni u bru toh uwa tip kam u Dilip Rajput, wei katkam wa pyntip kiwa ha-yung ha-sem da sdang u wow diaw mynsien hadien wa chah ujor pyn ha ka kurim u kawa da ong wa dat u ka heipor wa muaid u.
Katkam wa da thoh u Dilip ha patlun u, hadien wa lai u deilang wa u pa u cha Police Station, da em uwi u Constable uwa tip kam u Yashwant Yadav uwa da dawa poisa ₹50,000 yow pynbait yeini i kaam wei hadien wym bien u su yeini, da em ar ngut kiw ki Constable wa da dat oo. Hadien won da wan uwi u heh pulit wa tip kam u Mahesh Upadhyay uwa da pynhiar ya ka poisa wa dawa cha ₹40,000 wei du hadien wa su yeini da pynlait ya u Dilip.
Manda liwan u Dilip cha yung, da thoh u yeini wa jia deilang i pyrtuid ki pulit kamjooh kiwa emyatoh ka kurim u wa kynthup nadooh u pa ko, u Vanwari Lala, u payu ko u Raju kiwa da pyndik ya oo hadooh wow pasi u hapoh kamra u ynnin ka sngi.
Neiliang u pa u Dilip da ong u wa ya u khon u da wan wow thooh oo da ki pulit hadien wa ujor ka kurim u wei manda poi ha Police Station da chah dat wei da chah dawa poisa u wei yeini waroh wa jia da thoh u ha ka patlun u.
Katkam wa khana ki pulit, u Dilip, ka kurim u deilang u maa u uwa tip kam u Jitendra da yamai ki ha ka 15 tarik wei hadien ini da lai booh u ya ka kurim u cha yung bei ko. Ka kurim won deilang kiwa ha-yung ki da lai ujor FIR ki ha ki pulit.
Hapoh Police Station da emlang waroh arliang heiwa ki pulit da ye ki wow pynyasuk tangwa u Dilip manda poi u ha yung da pasi u ya idæ wei katkam ka Post-Mortem Report da ong wym em ki dak wa chah dat.
Heiyatoh wa ini wa jia da booh FIR da kiwa ha-yung u Dilip wei ka takit da lai ko chakhmat heiwa ki bor sorkar da ong ki wow pynchitom katkam wa chem ka takit.
Discussion about this post