Jowai: Chibynta wow nangpynkrai chooh chooh yaka chnat krehkaam hapoh Ri-loom Jaiñtia, ka Hynñiewtrep Youth Council (HYC) ynne ka sngi da pynskem wei pynbaam smai ko yaki dkhot yong ka HYC Laskeiñ Block Circle ha u Loom Tiniang yong ka chnong Mowtyrshiah, West Jaiñtia Hills District.
Da wan wow pynbaam smai da u President ka HYC seiñbei u Robert Kharjahrin, hei emlang u Mewathi Suchiang, President HYC Jaiñtia Hills, u Roming Lamare, General Secretary Jaiñtia Hills, u waheh chnong Mowtyrshiah u Hamly Dkhar, u Secretary ka Raliang Elaka u Rikut Parein wa kiwi kiwi.
Hawa klam kyntu kynpham ya ki dkhot thymme, u Robert Kharjahrin ong u wa i psiah seiñ toh i kreh mon sñiawbha wei wym em iwon iwon i su, tangwa dawa kylla ko yei bor wei por u sai neibynta ka ri.
Chooh chooh hawa em hapoh ka seiñ toh u em i bahkhlieh wei kreh yei kaam deiwa yoo jngai, nalor wow yakrehlang waka chnong, ka Elaka næ ki seiñ waphær waphær kamjooh wot wow embynta lang wa ki bru sorkar neibynta u wanrah yei roi i paar wa i bha i miat.
Da kyntu haroh u wow man kitæ ki chipai ki wow yakhun wei yada yei hok kyrpang ka ri ka jaitbru khlem i pyndem næ chong ngiah wei khlem iwon iwon i artatien, kamtæ yooluti u wa kani ka yurim u psiah ko wym du hei thij i pyrkhat yong ki dkhot tangwa u psiah ko wot hei mynsien yong ki heiwa wym em kiwon kiwon leh wa ye u thied.
Ki dkhot yong ka Laskeiñ Block Circle kynthup ya u Wympher Suchiang kam u President, u Shlurbokmi Suchiang wa u Pynjurbha Suchiang kam ki Vice President, u R. Lyngdoh kam u General Secretary, u Ramio Dkhar wa u Dalio Papang kam ki Asst. Secretary, Publicity Secretary u Pyntip Papang, Asst. Publicity Secretary u Leaderious Lyngdoh, Education Secretary u Hammarbamut Suchiang, Asst. Education Secretary u Apdameihi Papiah, Sport Secretary u Kularskhem Sariang, Asst. Sport Secretary u Poineer Lamare, Organising Secretary u Jeningstone Lamare, Asst. Organising Secretary u Bhawan Dkhar, Office Secretary u Deihok Suchiang, Environment Secretary u Ialammiki Syngkon, Asst. Environment Secretary u Wanbiangki Saioo, Adviser u Medius Passah deilang wa 34 ngut ki dkhot.
Ha kani ka sngi neiliang ka seiñ da pynman haroh ko yei thung dieñ kamwa 30 tre ha u Loom Tiniang wada chimbynta nadoh u President ka seiñbei wa kiwi kiwi.