U Montri Rangbah ka jylla, u Conrad K Sangma ynne da wai u ya ka ‘German Language Training Programme for Overseas Placement’ wa em ha Shillong Tech Park yow e sikai klam ktien German yow yoh kreh ha kani ka ri.
Ya kani da kyrchaan da ka Meghalaya State Skill Development Society (MSSDS) hapoh ka chnat Labour, Employment & Skill Development, yow e sikai ya kitu kiwa em hei kaam sumaar sukhær kam ki Nurse.
Ini toh hadien wa da ye wow phah ya 45 ngut kiwa na Meghalaya yow kreh ha Japan wa Singapore wei kattu won sa ka Germany yow yoh kreh ki Nurse wa kiwi kiwa em hei kaam e sumaar.
U Conrad da pyntip u lada ye u phah 30,000 ngut cha baar ri, ka poisa wow phah ki dapoi ko hadooh ₹250 klur chi bnai iwa mut ₹3000 klur chi snem cha ki yung ki sem yong ki.
Da ong u leh wa ki manbei manpa kiwa artatien nachwa, katni da nood ki neibhah da kitklieh ka sorkar yei bha i miat kini kiwa lai kreh cha baar ri.
Da kular u leh wow lai lang wa kiwa nyngkong dooh wa chah jied yow lai kreh cha Germany.
Neiliang ka Andrea Jeske kawa man kam ka Deputy Consul General wa mihkhmat ya ka German Consulate Kolkata, da pyntip ko wa ka Germany toh kawa duna bha ki bru wa em hei kaam sumaar sukhær wei kat ha u snem 2035 daw emkaam ki 70 lak ngut ki bru kiwa man kam ki Skilled Workers namo kiwa da pynpliah hei kaam wa leh ki. Wei ynne da man ko ka laad yow yoh kreh wei wow hoi bru deiwa kreh ha Germany.
Da pyntip ko leh wa Germany em ko ka Policy yow pynksuk ya kiwa kreh wa wan na baar ka European Union.
Yei e sikai daw leh da ka IndieTalent deilang ka 2COMS Group kamjooh leh wow pynbiang ki kot ki sla nadooh ki Visa kamjooh ki thaw kreh.
Ka Payel Bhattacharya, Business Head ka IndieTalent da ong ko wa kiwa na Meghalaya da pynyoo ki yei sap yong ki deiwa yoh u kreh ha Japan wa Singapore, kattu won sa ha Germany.
Ka e sikai u man ko 6 bnai chwa ya ki 20-30 ngut wow klam ktien German hadooh ka B2 Level wei daw pynbood sa ki Interview, i yaleh Visa wei wow thung kreh ha ki thaw sumaar wa bna naam ka Germany.
Discussion about this post