Shillong: Ka sorkar jylla da pynbna ko wa ya u saroo ym kheiñ de ya oo kam uwa mih hi-eh cha khloo wei u kheiñ noh kam u mar wa rep khnang da ki paidbah ha ki thaw khloo namo u jait thung wa tip kam u Agro-Forestry Plantation wei u lait noh u ya i chah toh dan. Ya ini da pyntip da u montri wa pait ya ka kaam rep, u Banteidor Lyngdoh hawa yaklam wa kiwa thoh khubor ha kamra krehkaam yong oo.
U Banteidor da pyntip u wa da mynjur ya kani ka pynbna ha ka 14 tarik uni u bnai wa ki warep nadooh kattu ym emkaam de ki wow su ya ka dan cha ka chnat Forest næ cha ka KHADC.
Kam wow pynkynmoo wa ka sorkar MDA ini wa da dep da pynlait ko ya ki arjait ki jait thung wa mih ha khloo yow lait ki naka dan deiwa tipmit ya u murit khloo wa ya ka slatyrpad kam ki mar rep, wei katni ka sorkar da pynlait ko sa ya u saroo nei chah toh dan.
U Banteidor da pyntip u wa na ini i pynbna ya u saroo, ki warep daw lait ki na i doohnong hei wow su khajna wei kamjooh leh i yoh myntoi næ bai lutksan na ka chnat lada em i chah ktah ha i bor rymmaw.
Heiyatoh won wa i dor yong u saroo, neiliang u montri da kyntu u ya ki warep wa toh u em sñiawthooh yumut wow yoh ya iwi i dor yow im lang, tangwa hawa kylli da ong wa ka sorkar ym ye ko wow booh dor neidaw wa u saroo toh uwa mih ha ki thaw wa jngai na ki thaw sor wei ka luti ym man ko kawa miat bha ha ka kit ka bah. Da pynrap deiwa ong leh wa ka sorkar da chim ko ya kani ka laad ka luti neibynta myntoi yong ki paidbah.
Hawa yatoh wa em kiwa ong wa ki thaw wa rep ya u saroo ym jooh man de ko kawa sboh wow rep neibynta kiwi won ki jait thung neidaw wa baam lut u yei sboh, neiliang u montri da ong wa ya kani wa chwa wow pynbna da sylli bha da ka chnat ka rep ka riang wei hadien wa da chem wa kani ka rep ya u saroo da man ko kawi na ki laad wow pynim jakpoh ya ki warep da chim ya kani ka rai.
Discussion about this post