Ki pulit ka Railway Protection Force (RPF) ka Balangir ha ka 5 tarik da kem ki ya ar ngut ki khynnah khian kiwa leh yei kaam wa da booh yei mynsien ki hei maa ha luti rel yow chna Reel ha Boudh District ka jylla Odisha.
Ini da jia i chnong Dalupali hajan ka Purunapani Railway Station wa em ha thaaiñ Manmunda kawa dang haap hapoh ka Baunsuni Police Station. Ha ini i Video wa da poor bha, da yoo ya uwi na kini ki khynnah uwa da thiah dei chrooh hakhap ka luti rel katwa u lok won u da riñ Video u heipor wa wan ka rel wa lai luti. Ha ini i Video ym em jia iyi iyi leh ya uni u khynnah.
Hadien wa palat ka rel, uni u khynnah da yieñ u yow chondur ki lok u kiwa da thaap kti.
Hadien wa poor ini i Video, ki paidbah da beiñ ki yeini wa yoomaa wa leh kini ki khynnah khamtam wa kani ka luti rel toh kawa dang wai wot ha Boudh ha u bnai wa dep.
Yeini wa jia da takit da ki RPF wa ki pulit ka Baunsuni wei da chem wa kini ki khynnah toh kiwa 12 wa 15 snem i rta wei da lai kem ya ki heiwa u khynnah wa thiah ha luti rel da ong u wa heipor wa lai ka rel najrong da ong u wa da yap bait u wei u lok u uwa riñ yei Video da ong u wa lada leh u yeini daw man Viral i Video.
Ya kini ki khynnah da wan yah da ki bei ki pa ki cha ka RPF Post ha Balangir wei da Register leh ya ka Case wei da hap soi soskular ki bei ki pa ki wow pyntikna wym jia de kam ini neini chakhmat heiwa da pynlait leh ya kini ki khynnah.
Neiliang ka East Coast Railway da kyntu ko ya ki manbei manpa kamjooh kiwa sikai skur wow sneiñ ya ki khynnah ki wym toh wow leh ya kam kini ki kaam wa ye u yah chei yap chei mynsoo khamtam ha ki luti rel.
Discussion about this post