Ki khon ka Raij Kongwasan Chyrmang ynne ka sngi da pyndep ki ya ka lehniam Behdieñkhlam kawa da pynman hadien u 2019 wa da pyndep khaddooh ya ka neibhah wa ha u 2020 da hap pyndam ya ka neidaw wa krehkaam syndet ka Lockdown wa wan ka khlam COVID-19 ha waroh kawi ka ri.
Kani ka lehniam ka Raij da sdang ya ka nadooh ka 16 tarik uni u bnai heiwa da sdang ya ka Sdang Khrong Sdang Khri na ki Manyung Mansem wei nadooh kani ka sngi da sdang leh wow choh ya ka bom.
Kamtæ nadooh ka 16 tarik da pyndep ya ki lehniam wa ki kñia jar jiar ki sngi kiwa man kam chibynta yong ka Behdieñkhlam kam ka Than Blai, ka Thoh Langdoh Kñia Ryngkaw, Hat Khrong, ka Kamcharoh Blai, ki Chaad Yung Chaad Thyndai wa kiwi kiwi hadooh wa poi ynne ka 28 tarik wow pyndep ya kani ka lehniam.
Ynne i step ka 28 tarik dang step da pyndep ya ka Chaad Yung Chaad Thyndai yeiwa da pynbood ya i Chaad ha Yung Langdoh na ka Chyrmang Neiñ wa Chyrmang Wah wa i Sehbhang.
Ha i sngi ki khon ka Raij da wanrah ki ya ki 9 tylli ki Rong ki Rot kiwa da chna nadooh ki sngi wa ki tayaw wa dadep wei ha Aitnar chirup wa i kieh ki bom, ki bhuri wa bikur, ki khon ka Raij da chaad ki wow pynyoo yei mynsien wa ka’it wa kmen ki.
Ynne ka sngi ya ka lehniam ha Aitnar da wan sakhi da u MDC ka Jowai South, u Saron Paswet, u Dolloi ka Elaka Jowai, u Puramon Kynjing wa kiwi kiwi.
Katkam i ngait ki khon ka Raij, du hadien wa pyndep ki ya kani ka lehniam daw ye ki wow hiar rep cha hali cha pynthor ya i wow yahkhmat chwa da u Langdoh ka Raij ha ka 30 tarik uni u bnai.