Ka sorkar Meghalaya dadep ko wow yaklam wei yasyllok wa ki bor yada khappood wa kynthup ki BSF, ki chnat wa toh u pait yei yada yong ka sorkar jylla wa sorkar pyrdi neibynta wow pyntikna yei chngaaiñ ha khappood India-Bangladesh.
Ini i yachem yong ka sorkar wa ki bor yada pood toh hadien i jia ha Pahalgam, Jammu & Kashmir, heiwa da em kamwa 26 ngut kiwa hap ha ki kuli ki bru wa kieñ suloi.
Hawa klam wa ki laad pathai khubor, u Symbod Montri Rangbah ka jylla wa pait ya ka chnat Kaam Pohyung (Police), u Prestone Tynsong da khana u wa ka sorkar jylla dadep ko wow yaklam sani bha neibynta i chngaaiñ ha khappood India wa Bangladesh khnang wa waroh ki bor wa toh u pait wei yada u em ki heijooh i pyrkhat yow pyntikna wa chngaaiñ ha khappood khamtam wa ka ri Bangladesh kawa em hapyrdi i kulmar ha ka saiñpyrthai.
Hawa kylli hajrong ki thaw wym pu em kær sainar chieh, u Prestone da ong u wa kani ka srokar da chimkhia ko deiwa pynkhlan ki bor yada wa kynthup ya ki BSF wa ki pulit ka jylla, ryngkat i ya krehlang wa ki bor pynlai chnong kamjooh ki VDP yow pyntikna wym em i wan psiah pyrchah aiñ ki bru na Bangladesh.
Discussion about this post