Uwi na ki bru wa kreh mon sñiawbha na East Jaiñtia Hills District (EJHD), u Reachingson Siangshai, ha ka 26 tarik uni u bnai da paan pynche u na u Public Information Officer (PIO) ka District Selection Committee (DSC) ka EJHD heiyatoh wa i slem wow jubab ya ka RTI kawa ar na ki le tylli wa da booh u nadooh ka 9 tarik u Naiynñiaw 2025.
Ha ka dorkhat wa dang booh u Reachingson da ong leh wa da kyntait u wow yachem wa u Deputy Commissioner ka EJH, kamwa da pyntip ka Dealing Assistant cha oo yow lai paitbniah yeiwa jubab iwa u PIO da pynkhreh u wow e cha oo neibhah wa u DC toh u Chairman yong ka DSC wei ym ye u wow e jubab yeiwa da paan katkam ka aiñ yong ka RTI.
Chooh chooh da ong u wa da yoh u ya ka chithi namo ka Intimation Letter ha ka 11 tarik uni u bnai wa da palat na i por 30 sngi wa u PIO toh u jubab u ya ka RTI, yow lai pait lada ki kot ki sla da biang næ ym pu em tangwa da kyntait u wow chim neibhah wym pynhun ko ya oo katkam ka jubab wa kwah u wow yoh.
Da ong u leh wa ya i kreh Demonstrator Jr,I kawa da sahteiñ nadooh u snem 2019, ka DSC da pynmih noh ko ya ka Notification ha ka 25 tarik u Naisaphra 2025, wow pynman ya ka Personal Interview wei ini ye i wow man nei paan RTI yong oo wow yoh yei jubab wa che heiyatoh wa ki kreh hapoh ka District.
Ya ini da ong u Reachingson wa da leh neibhah hadien wa dadep pait ya ka jubab (Information) kawa da pynkhreh da u PIO heiwa da kylli u cheiwon wiar ka Result yong ka Post Demonstrator wei u PIO da jubab u deiwa ong wa daw pait wei daw jubab u.
Ka DSC da pynmih won ko da ka Notification wow pynman ya ka Personal Interview ya katai ka kreh iwa da pynphylla ya u Reachingson wa ye u em iyi iyi cha lyndet.
Ha ka Notice wa da pynmih da ka yung krehkaam u DC, da ong wa i daw wa pynslem u khut ya ka Personal Interview nadooh u snem 2021 toh neidaw ka Roster Reservation.
Discussion about this post