Shillong: Ha ka sngi wa khaddooh ka dorbar mang tyngka ka jylla, u Montri Rangbah ka jylla, u Conrad K Sangma da ong u wa em hadooh 5894 tylli ki kreh wa lait ha ki 48 tylli ki chnat sorkar ka jylla, wei yeini da ong u hawa jubab yeiwa kylli u MLA ka Congress na Umroi, u George B Lyngdoh.
Katkam ka yukheiñ wada yoh, u Conrad da ong u wa ka chnat pulit toh kawa boon dooh ki kreh wa lait heiwa da lait hadooh 1962 tylli ki kreh, yeiwa da pynbood sa ka chnat puræ puthi kawa em hadooh 1370 tylli.
Chooh chooh da ong u wa nalor kini ki chnat, da em ka Health and Family Welfare kawa em 329 tylli, ka Agriculture Department 243 tylli, ka Forest Department 252 tylli, Home Guard and Civil Defence 227 tylli, Soil and Water Conservation 234 tylli, Secretariat Administration Department (E) (206) wa kiwi kiwi.
Da ong u leh wa napyrdi kini ki 5894 tylli ki kreh, 1894 tylli ki da ekti cha ka chnat Meghalaya Public Service Commission (MPSC), District Selection Committees (DCS) wei em leh kiwa da ekti ha ka Secretariat Administration Department (SAD).
Hawa pynrap chooh chooh neiliang u George B Lyngdoh da kylli u wa lada ka sorkar thmu ko wow pait biang ya kini ki kreh wa lait khnang wow ye u pyndap smat ya ki, neibhah hadooh katni da slem emkaam wow pyndap noh ya ki.
U Conrad da ong u leh wa ka MPSC wa ki DSC neipor cheipor khut ki wow pyndap ya kini ki kreh wei ini dang pteiñ i hadooh katni wei ini ym man i iwa suk neibhah wa haap bood ya ki kyndon krehkaam ki chnat sorkar.
Discussion about this post