15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Hadooh T. 28 Lak tam e ka NETC cha ki 15 tylli ki skur wow man kam ki Model School ha WJH

0 Comments
Advertisement ad1

Jowai: Ynne ka sngi man ko ka sngi wow sah kynmoo ya ki 15 tylli ki skur hapoh West Jaiñtia Hills heiwa da pynman ya ka yalang ha Lumthadmuthlong LP School, Thadmuthlong wow wai noh ya ki (15 skur) wow man kam ki Model School.

Ya ka yalang ynne ka sngi da pynlai da ka M. Pde kawa man kam ka District School Education Officer, WJH heiwa u DC ka District, u R. Rapthap da e u ya ki kyntien pdiang burom heiwa da ong u wa da mang wow leh ya kani ka Model School Project ha ki 10 tylli ki skur ka District tangwa nei chemphang ka yungkrehkaam ka District Mission Co-ordinator (DMC) ka SSA da ye wow leh ha ki 15 tylli ki skur ka District.

Advertisement ad1

Ka DMC ka Dr. LM Darnei hawa e i klam da pyntip ko wa ya kani ka Project toh kawa da e poisa da ka North East Transmission Company (NETC) hapoh ka Corporate Social Responsibility (CSR) kawa da thoohlaad nyngkong da u DC warim ka District u Arunkumar Kembhavi wei dei chemphang yong oo da yoh u yaklam wa ki sahep kani ka Company.

Waroh ki skur wa yoh yarap hapoh ka District em ki 15 tylli wei i lut da kynjoh i kamwa T. 28,72,500.

I thmu kani ka project toh wow wanrah ya i puræ puthi wa rap phær kiwa man katkam ka juk wa katni wei wow pynduna yei dam skur ki khynnah khnang wow yoh ki ya ka mynried wa tyrchaaiñ.

Hapoh kani ka project ha ki skur wa yoh myntoi na ka, da booh ya ki tiar ki tar wow pynsuk ya ki khynnah ha ki puræ puthi, ha ki chram da dro ya ki dur wa ha rukom wow pynka-it ya ki khynnah, ki dur ha ki slait wa kiwi kiwi.

U kongsan ha kani ka sngi, u Ashwani Jain uwa man kam u Director Projects, NETC uwa man leh kam u kongsan da ong u wa ha kani ka juk wa katni hei beh khih beh kreh mylliñ i yei kaamram yong i cha ka imlang sahlang.

Hanlada yoh myntoi ki 15 tylli ki skur, sñiaw u wa ympu man i iwa biang wei yooluti wow ye wow leh chooh kam kini wei ini chong i ha ka Board of Directors ka Company.

Ya kani ka sngi da pynphooh da ki chaad wa ki rwai na ki khynnah wei da pynkut ya ka yalang da ki kyntien e khublei na ka D. Khonjong, kawa man leh kam ka Joint Director of School Education and Literacy.

Ki skur wa yoh myntoi na kani ka CSR kynthup ki ya kini hawah:

  1. Sunny Dale LPS, Lad Muhla.
  2. Corner Stone LPS, Wahiajer.
  3. Kiang Nangbah LPS, Umlangshor, Mukhla.
  4. Halari LPS, Nangbah.
  5. Dongmihsngi LPS, Pasyih.
  6. Lum Thadmuthlong LPS, Thadmuthlong Pyrdi.
  7. Modern LPS, Khliehphyrnap, Ialong.
  8. Rilang Memorial LPS, Deintharea, Ummulong.
  9. Lummushai LPS, Shangpung.
  10. Riwar Jaintia COG LPS, Ladjaplem, Amlarem.
  11. Ladthadlaboh Govt. LPS, Jowai.
  12. Kurimai Memorial LPS, Jowai.
  13. Dongmihsngi LPS, Jowai.
  14. Loompyrdi Iongpiah LPS, Jowai.
  15. Tpep-Pale Govt. LPS, Jowai.

Share this:
Previous

Jop ka Brotherhood United waka Salan United ynne ha ka Lion 5 Knockout Football Tournament 2018

Next

Da pynman ka DLSA ya ka esikai hajrong ki aiñ wa i hok ki khynnah