U Montri Rangbah ka jylla u Conrad K Sangma ynne hawa yaklam wa ki laad pathai khubor heipor wa lai pait u yaki thaw uiñke suwari wa em haka thaaiñ Cham Cham, East Jaiñtia Hills da pynche u hajrong ka yurim wa da kyrriah noh yaka Jowai PWD (Road) North Division cha Shangpung.
Iwa nyngkong da ong u wa kani ka chnat PWD toh kawa pait du ya ki thaw wa em ha ar tylli ki Constituency ka Mowkaiaw waka Raliang wei 100% ki kaam wa yatoh waka toh kiwa em du hapoh kini ki ar tylli ki Constituency kamtæ wow suk u krehkaam, man iwa bha wow em kani ka yung krehkaam ha Shangpung, da ong u Conrad.
Iwa ar won da ong u wa waroh i jait toh u nang ku chaneiñ dang lai chakhmat ym du ki thaw sor kamjooh waroh ki thaw palatsor deilang waka jylla waroh kawi. Wei ini i rah ya kani ka Division daw pynku ko yaka chnong Shangpung heiwa ki thaw palatsor leh da yoh ki yaki yung krehkaam sorkar iwa man leh iwa bha.
Iwa le won da ong u wa ka chnong Jowai leh toh u ku ko wei da pyrkhat yillu bha wa kammon wow pynman ya ki chnong kam ka Jowai wa Tura kiwa ku kyrdan heiwa daw wanrah yaka Smart Town heiwa nyngkong toh wow pynbha pynmiat yaki sarok wa em hapoh ka chnong kam ha Jowai, Tura, Nongstoin, Williamnagar kam chibynta ka Smart Town wei neini chakhmat daw yoo phi yeini kamjooh i pynbiang ya kiwi kiwa emkaam.
Da ong u leh wa da em ka Project yow pynmiatdur yaka Jowai wa Tura heiwa da mang poisa mar T. 10-15 klur wow leh ya ini ha kini ki ar tylli ki chnong iwa man leh kam chibynta ka Smart Town. Daw pynbha pynmiat leh yei rukom pyllang jhep ha kini ki chnong.
Kamtæ da ong u wa da sñiawthooh wa kini ki chnong emkaam ki ya kawi ka thaw wa em hapyrdi ka wow ye u e chakri cha ki paidbah wei na ini da mih ka buit wow booh noh da ki Mini Secretariat kiwa daw sdang nyngkong ha Jowai wa Tura. Wei ha kini ki snem wow wan, waroh ki chnat krehkaam ka sorkar nadooh ka yung krehkaam u DC daw em ki hapoh kawi ka tnoom yung.
