U Symbood Montri Rangbah ka jylla wa pait ya ka Kaam Pohyung, u Prestone Tynsong da ong u wa kiwa yahkhmat ka seiñ Hynniewtrep National Liberation Council (HNLC) ymtoh wow tieñ wow artatien ki yaka sorkar, tangwa toh u yaklam ki waka sorkar, wei lada kwah ki wow lai yaklam cha baar jylla leh ymphær, ka sorkar man ko kawa da khreh wow lai yaklam cha kawon kawon ka thaw leh.
Hawa klam ynne ka sngi, u Prestone da ong u wa hadooh kamwa soo bnai ka sorkar da chimkhia ko yei yada ya ki dkhot ka seiñ hawa wan ki wow yaklam chapoh ka jylla wei ym em wa kem næ pynthut ki, kamtæ kiwa yahkhmat wa hakhliehdooh leh ymtoh wow em ki yei artatien. Da ong u wa ka sorkar da klam che ko cha kiwa yahkhmat ka seiñ wa ka sorkar jylla waka sorkar pyrdi da kyrpaad ko wa kiwa yahkhmat wa hakhliehdooh ka seiñ toh u wan ki chakhmat wow yaklam markhmat waka sorkar, ym da kiwa yahkhmat kiwa rap khian.
Hawa kyntu ya kiwa yahkhmat ka HNLC wa ymtoh u tieñ ki ya ka sorkar, u Symbood Montri Rangbah da ong u wa ka sorkar wai ko yaka dwar wei ki toh u wan ki chakhmat wow yaklam khlem iwon iwon i tieñ. Da ong u wa lada tyrwa wow em i yaklam ileh won ym chaniah ki wow yaklam wei em hi mo wa ka sorkar leh bakla ko iyi iyi.
U Prestone da ong chooh chooh u wa hei yong sakhiat ka sorkar kwah ko wow poi i yaklam cha ka thong hadooh wa kut wei da kyntu u ya kiwa yahkhmat ka HNLC wow wan chakhmat u yaklam khlem iwon iwon i tieñ næ ka kyndon.
Kam wow pynkynmoo wa hadien wa ka sorkar da pynsñiaw ko yei kwah da kiwa yahkhmat kiwa hakhliehdooh wow chimbynta hei klam yasuk, neiliang kiwa yahkhmat kiwa hakhliehdooh ka HNLC wa kyntup ya u Chiarman, u Bobby Marwein wa u General Secretary-cum-Publicity Secretary, u Sainkupar Nongtraw ynnin ka tayaaw da pynsñiaw ki wym kwah ki wow chimbynta hei yaklam yasuk kat wym pu pyndam noh ka sorkar ya waroh ki mukotduma wa sah pyrchah ya ki wei wow yasoi leh ya ka soskular sangeh yasiat.
Discussion about this post