Hadien wa ka Joint Action Committee hapoh ka North Eastern Hill University (NEHU) da lai ki wow pynsangeh ya ka yalang yong ka Academic Council ynne i step, da lai won ki wow li beh ya u Rohit Prasad na ka kamra wa krehkaam u wei da paan leh ya u chabi kamra deiwa ong wa da yoh u yei kreh pyrchah ya ka aiñ kamtæ da chong u leh pyrchah ya ka aiñ ha kani ka kamra.
Neiliang u Rohit Prasad da kyntait u wow e kti ya u chabi deiwa ong wym em u ha oo, tangwa neiliang ka JAC da pynbor ko wow pynman ya oo wow lai thooh nei thaw wa sah u, wei neidaw wa ini i toor paidbah ki dkhot ka JAC wa kynthup ya ka NEHUTA, NEHUNTA waka NEHUSU pyrchah ya u Rohit, da hap synraan bait da ki bru wa e yada namo ki Security Guard yong katai ka skurbah.
Ka JAC da dawa ko na u Vice Chancellor ka NEHU wa toh u pyndam kreh noh ya u Rohit Prasad deiwa e por hadooh ka 26 tarik uni u bnai, tangwa neidaw wym bna u VC ya ini i dawa, neiliang ka JAC da lai ki wow khyndang hi ynne ka sngi ya u Rohit na ka kamra krehkaam wa chong kreh u.
Neiliang ka JAC da pynbaad ko wa ya u Rohit da thung kreh pyrchah aiñ kam u Technical Officer/Senior Consultant da u Vice Chancellor, u Prabha Shankar Shukla khlem da pynmih iwon iwon i pynbna namo ka Advertisement, tangwa da leh hi bait da u VC wei ya ka Interview da leh lyngba ka Video Call.
Hadien ini da yoh ya u chabi heiwa ka JAC da khang syndon ko ya ka kamra kreh u Rohit deiwa ong leh wa daw hap mih noh u sa na ki thaw sah (Quarter) u wei ym tipmit de oo kam uwa kreh ka NEHU.
Discussion about this post