U MLA ka Mawkynrew uwa man leh u Montri wa pait ya i kaam rep ha ka jylla, u Banteidor Lyngdoh da ong u wa em ki bru kiwa da lai wow paan ya ki ‘EPIC’ wa Xerox Copy ka Passbook na kiwa chong chnong ki chnong kiwa haap ha ka Mawkynrew wa Mawryngkneng C&RD Block deiwa kular wow e Scheme mar T. 5000 ya ki.
U MLA hadien wa da yoh yutip ya ini da khut yalang jhan u ya ki paidbah yong kitai ki ar tylli ki Block kiwa haap hapoh ka Mawkynrew Constituency wow pynche hajrong ka Scheme wa da wanrah da ka sorkar wei wow pynlait ya kiwa chong chnong nei chah yahbakla.
Ha kani ka yalang, u MLA da wan yah u ya ki BDO wa ki sahep yong kitai ki ar tylli ki Block kiwa da pynche hajrong ka Scheme yarap na ka FOCUS wa FOCUS+ kiwa toh ki Scheme yarap poisa ka sorkar jylla cha ki warep kiwa em ha ki Producers’ Group.
U Banteidor da ong u wa man iwa phylla wow tip wa em ki bru kiwa da lai wow paan ya ki EPIC neibhah kamwa man katni em bait du ka FOCUS kawa man ka Scheme yarap ka sorkar. Da kyntu u ya ki paidbah wa ym toh u sñiawthooh bakla wei ym toh u ngait yei yah bakla ki bru ki wym toh ki yong ka sorkar kiwa lai pynlang EPIC wa Passbook.
Da khana leh wa kam ini i chukor ya ki paidbah da jooh jia i ya ki paidbah ha ki snem wa da dep ha kawa da em ki bru kiwa paan Passbook wa Account Number deiwa kular e yarap poisa wei wow phah soi ha ka kot sada, tangwa hadien san wa ynru bnai won da poi i thoh na Bank cha kitai ki bru wei waroh kamwa 70 hadooh 80 ngut na ki toh kiwa hap wow su ya ka ram wa da chim kamwa T. 2 lak, wei katni ka takit hajrong ini da em hapoh ka CBI.
Ha ka yalang da yoh i klam pynche na u Albinus Nongkynrih, Assistant Manager In-charge EFC, Mawryngkneng Block, u G. Dhar, BDO ka Mawkynrew Block, ka AR Kynta, BDO Mawryngkneng Block, ki wakreh na kitai ki Block cha kiwa yahkhmat chnong wa kiwa chong chnong waphær waphær.
