Shillong: U Chairman yong ka Mawmluh Cherra Cement Limited (MCCL) u Wailadmiki Shylla da ong u wa ka sorkar ka sñiawthooh wei tip ko yei eh wa yachem ki wakreh ka MCCL wei kamtæ ha u Kmaichonglad (Dec) daw pynlait ya ka poisa yow su ya ka tulop ka yong ki tangwa ym pu ye wow ong wa katwon ka poisa u pynlait.
Da ong u wa kam u Chairman, ym em chong klikti u hajrong i eh yong ki wakreh ki wym yoh ya ka tulop, heiwa da pyntip u leh wa da yaklam leh wa u Montri Rangbah yow yoh u pynlait ya ka T.2 klur wei da su T.1.50 klur cha ka tulop yong ki wakreh, katwa T.50 lak yow pynpoi mooyong ha karkhana.
U Wailad da pyntip u wa hawa kheiñlang ya ka tulop waroh kawa dang sah wei ya kawa daw hap wow su cha ki wakreh da poi ko palat ya ka T. 20 klur, deiwa ong leh wa ini i eh wa ki wakreh ka MCCL da maad ki ym toh iwa thymme tangwa toh iwa nadooh ki snem kiwa da lai, hanla kattæ leh neiliang yong ka sorkar u pyrchang ko katwa ye wow chimkhia neibhah kamwa man kattæ, em ko hapyrdi i eh wa khroo nalor i ktah ka khlam COVID, ka MCCL ym ye ko leh wow krehkaam næ pynmih khyndaw-bilat.
Da kyrpaad u ya ki wakreh yong ka MCCL wow yai chah ki chipor, neibhah wa ym man iwa suk wow pynbiang lut nadong chadong du ha i por wa tbian, tangwa suki suki daw ye wow pynbiang ya waroh iwa emkaam.
U Chairman da pyntip u leh wa emkaam hadooh T. 180 klur neibynta wow pynthymme biang ya kani ka karkhana pynmih khyndaw-bilat ha Sohra kawa man kawi na kiwa da rim tam hapoh ka jylla. Da ong u leh wa ym em myntoi wow yarap T.5 næ 10 klur næ lada mam 50 klur tyngka leh wow pynim biang ya kani ka karkhana neibhah wa du hadien 2 næ 3 bnai, daw maad biang ya i jooh i eh, wei da pynrap wa man ko iwa eh ya ka sorkar jylla khamtam kam ha ini i por yong ka khlam COVID wow e yarap hadooh T.180 klur wow pynim biang ya kani ka karkhana.
Da pyntip u leh wa du ka bai tulop yong ki wakreh ka MCCL kiwa nadooh ki kyrdan sahep hadooh kiwa khian wa kynthup ya ka PF da poi ko cha ka T.1.43 klur ha ka chi bnai, kamtæ lada ym em i mih, man ko kawa eh ya ka sorkar wow su ya ka tulop.
U Wailadmiki da ong u, ka sorkar da booh ko le tylli ki laad ki luti (Option), kawa nyngkong wow pynlut T.180 klur yow pynkhai im biang ya ka MCCL, ka laad kawa ar wow e Joint Venture cha ki Company ki bru samen tangwa ym toh deiwa dai lut ya i mantre ka sorkar ‘Stake’ heiwa daw ksoh hi ka sorkar ya kawa boon khnang yow ye u kyntu biang ya ka naam ka burom yong ka MCCL wei kawa le toh wow khang khyrdep noh.
Ka sorkar ym kwah de ko wow pynlut kajiak kajiak wow pynkhai im biang ya kani ka karkhana tangwa kwah ko wow yoh da ka luti kawa biang wa chisien wa da e yarap poisa wa ym mih de i eh hadien ha bood, da ong u. Neiliang ka sorkar da pynlut ko hadoooh T.234 klur du wow su ya ka tulop ki wakreh, ki Contractor, ki Supplier wa kiwi kiwi wei lada pyrkhat ya kani ka poisa wa da pynlut, da toh wow yoh ya i rukom pynkrehkaam wa thymme, kamtæ neiliang ka sorkar ka kwah ko wow chim bait da i rai wa biang tam wa ym em i ktah de hadien habood.
“Nadooh wa nga chimkti O, da pyrchang O wow thooh ya iyi wa pynman ya kani ka karkhana wow em ko hapyrdi i doohnong, wei i daw toh wa ha ka chi tayaw da hap ko wow khang hadooh 2 næ 3 sien ya ki kor wei ha ha i thaw wow thang mooyong du chisien wow pynkhooid ya ki kor, da hap wow thang hadooh le sien, kamtæ da em i pynlut ke khlem i mih,” da ong u Wailadmiki.
Kamwa man, ka MCCL ha ka chi bnai toh u pynmih ko hadooh 8,000 Metric Ton i khyndaw-bilat tangwa nadooh wa da sdang ya ka ‘Dry Process’ du chisien da pynmih 10,000 Metric Ton tangwa ha kiwa boon ki por kiwa boon toh du 3,000 næ 4,000 Metric Ton wei nalor ini, ya ka khyndaw-bilat da dai cha yaw cha haat ha i dor wa T.340 næ T.360 chi churia tangwa yow pynmih won ya kani ka chi churia, i lut da poi ko cha ka T.600 næ T.700, kamtæ da boon i pynlut bar ya iwa mih, da ong u.
Kamtæ iwa emkaam hakhmat toh wow leh Joint Venture noh ya ka MCCL khnang wow ye u kyntu biang neibhah wa toh leh ka Company kawa da tip lut da waroh, ong u Wailadmiki wei da kyrpaad u leh ya ka Dorbar Mawmluh wa ya ka Hima Sohra wow wan ki chakhmat yow yaklam yow sñiawthooh neibhah wa i thmu ka sorkar toh neibynta i bha i biang yong ka Company, ki wakreh kamjooh leh ya kiwa chong chnong ka thaaiñ Sohra.
