U Montri Rangbah ka jylla, u Conrad K Sangma da ong u wa toh i kaam wa hap u chimkhia hawa em ki kynhun kiwa thmu wow seiñ ya ki seiñ kieñ suloi ha ka jylla, ya ini u Conrad da ong u hawa kylli hajrong i chah kem u Joannes Lamare deilang wa 3 ngut ki lok yong oo hajrong i suba wa em ki i thmu wow seiñ ya ka sdang thymme ha ka jylla deiwa yarap ka NSCN (IM).
Hawa klam ynne ka sngi, u Conrad da ong u wa ka sorkar daw pyntikna wow pynkhlan yei paitbniah yow khanglaad ya iwon iwon i jia.
Da ong u wa ka chnat pulit u kreh ko deiwa eh wow kdoh u khoom ya ki kaam damok kiwa ye u ktah yei suk i saaiñ ha ka jylla, heiwa ki pulit da yoh ki wow kem ya boon ngut ki bru kiwa rah ya ki tiar pynmynsoo ha ka thaaiñ Garo Hills.
U Montri Rangbah da ong u wa ki pulit leh deilang wa ki chnat takit da leh ki ya i kaamram wow paitbniah lada em kiwon kiwon kiwa thmu wow leh ya ki kaam kiwa ktah ya i suk i saaiñ wa chah pynchitom ki, heiwa da yaroh u leh yei kreh ki pulit deiwa pynrap wa emkaam chooh chooh ya i paitsiar wow pyndooh ya iwon iwon i jia wa ktah ya ka jylla.
