U MLA ka Nartiang Constituency u Sñiawbhalang Dhar ha ka yalang pynskem ya ki dkhot ka NPP 1-Nartiang Block Committee ha Iaw Pynsiñ, Wahiajer ynne ka sngi, haphrang ki hajar ngut ki paidbah na ka Constituency da wanrah u ya ka bui namo ka Report krehkaam yong oo ha ki san snem wa dadep.
Da khana u wa u sarok Nartiang-Nongpoh Road uwa jrong 22 Km uwa T. 45 klur da dep chna ya oo wei sah sadu wow wai noh ya oo.
Ya u sarok Demthring-Sohmynting-Moodymmai wa T. 45 klur dajan dep hi kattu, ka Lyrnai-Sohphoh Internal Road wa T. 2 klur, ka JNKK Road na Nangbah cha Khanduli wa da sih bha dadep khut Tender kawa T. 43 klur.
Ka NJB Road cha thaaiñ Nongjngi da mang T. 45 klur, u UTB Road na Ummulong cha Bamkamar wa T. 45 klur leh da dep khut Tender, ka Stadium wa heh kawa kynjoh T. 38 klur i kreh da lai i chaphrang, ka UN Road na Ummulong cha Nartiang wa T. 4.7 klur dadep i kreh, ki sarok Wahiajer Internal Road da mang T. 4.4 klur, ka Lumrod Internal Road ka wa T. 7.2 klur dadep kreh, ka Mookyndur P.R. Work neibynta i chna pynmiat wa kynthup leh kattu katni ha Ummulong dadep mang T. 5 klur, ha Lapangap da yoh Sanction T. 4 klur neibynta wow siang sarok rong cha waroh ki kyntoit.
Neitæ won ka JJM Scheme da mang lut ha waroh ki chnong wa kynjoh T. 220 klur, ka GRF wa dang kreh chaphrang wa jrong 40 Km da mang T. 39 klur.
Da ong u wa kiwa kongsan tam ya ki paidbah næ ki Community Development kiwa kynjoh T. 500 klur tam.
Chooh chooh heiyatoh wa ki Scheme samen dadep e yarap cha ki 27,000 ngut kiwa thap Vote khlem ñiaw chiliang hanla ha ka Election 2018 da yoh Vote u du 16,700. Kini ki 27,000 ngut kynthup ki ya ki 19,200 ngut ki bru samen wei hadien wa yoh ya ka Census na ka yung krehkaam Block da chem ya ki manyung wa duna hei yoh i laa wei da e yarap da ki tin sap yung cha ki 6,800 tylli ki manyung.
Heijooh i por da pynbna u leh wa u Montri Rangbah u wan wai noh u ya ka Namdong C&RD Block ha ka 21 tarik uni u bnai.
Heiyatoh won wa i chah klam ka sorkar MDA khamtam ha ki Social Media da ong u wa boon ki bru pynbaad ki boonjait wei ini jia i neibhah ka sorkar ym em thiah sngi ko tangwa kreh ko ya ki kaam, heiwa da nujor u leh ya ki kaam ki sorkar warim wa ka sorkar wa katni.
Chooh chooh da ong u wa kani ka sorkar da kreh ko ya ki kaam wa sahteiñ na kiwa rim, deiwa ong wa ka sorkar pynlut bor boon ko ha ki kaam pynroi.
Da pynrap u leh deiwa ong wa ym em ka sorkar wa nood ya ka kaam khappood (Border) neibhah wa tieñ ki ya haap chuki, tangwa kani ka sorkar won ym em u tieñ næ pyrkhat ko yei jop i rem.
