U MLA ka North Shillong, u Adelbert Nongrum, ynne da wanrah u ya ka phang hapoh ka yung dorbar yow dawa wanrah ya ka Resolution yow pynbor ya ka sorkar pyrdi yow pynkylla ya ka Schedule Tribe Order 1950 yow pyndam ya ki jaitbru wym em hapoh ka jylla Meghalaya na kani ka thup ki jaitbru ri-loom.
Da ong u wa ki Khasi wa ki Garo da booh ya ki hapoh ka Part-2 ha u 1950 heipor wa dang em du ka Assam deilang wa ki Chakma, Dimasa, Hajong, Hmar, Kuki, Mizo, Naga wa kiwi de wei ya kani da pynkylla biang ha u snem 1976 da ka Parliament deiwa booh sa ka Part-11 neibynta ka jylla Meghalaya tangwa ha kani leh da booh thij kamwa em ha ka Part-2 heipor wa dang em du ka jylla Assam chwa wow pynkha ya ka jylla Meghalaya.
Hadien won manda mih ka jylla Manipur, Tripura wa Mizoram, kamtæ da ong u wa da toh wow pynkylla noh ya kani ka Schedule Tribe Order katkam wa da kylla leh i rukom em ki bru ha North East India heiwa ki jaitbru Naga da yoh ki ka yong ki hi ka bynta, ka Manipur leh da yoh ko ka yong ka hi ka bynta deiwa em ki Kuki, ki Chakma wei ka Tripura leh da yoh ka yong ka hi kamjooh ka Mizoram.
Kamtæ da ong u wa lada kini ki jaitbru da yoh ki yei thaw wa biang katkam ka jylla wa sah ki, ymtoh mo hapoh ka Meghalaya leh u em ko da kiwa biang ki jaitbru wa em ha ka.
Du ong u leh wa wa kawi donhi wa ye u ong wa ye ki wow em hapoh ka Meghalaya kitæ toh ki Biate kiwa em ha Jaiñtia Hills.
Da kdaw u leh wa hapoh kani ka Tribe Order da em i pyrtuid ki Pnar, Jaiñtia wa Synteng deiwa kylli ileh em ki kamni wei da toh wow pynbait yeini wei ki Synteng da mih biang ki sa chisien hapoh ka bynta wa 14 wei yeini leh toh u pyndam.
U Paul Lyngdoh kam u Montri ka chnat Arts & Culture, da ong u wa kani ka phang toh kawa emkaam bha, heiwa hapoh kani ka Schedule Tribe Order 1950 da em 17 tylli ki Schedule Tribe nadooh ki Chakma, Dimasa Kachari, Garo, Hajong, Hmar, Khasi, Jaiñtia, Synteng, Pnar, War, Bhoi, Lyngam, ki Kuki, Lakher, Mon, Mizo, Mihkir, Naga, Bawi, Bodo Kachari, Koch wa ki Rabha.
Da ong u wa waroh ki ST ha Meghalaya katkam ka Census 2011 da em ki 25,55,861 ngut iwa mut 87.19%. Katkam ka National Commission for Schedule Tribe Handbook 2016 ki Khasi-Jaiñtia da em ki 14,13,353 ngut iwa man 48.68%, ki Garo 8,21,026 ngut iwa man 27.67%. Kiwi ki Tribe da em ki 3,21,482 ngut iwa da man 10.85%.
Da pynche u wa ha u Naiynru 1999, ka sorkar pyrdi da mynjur ko ya ki kyndon ya kiwon ki jaitbru ST ki wow tipmit wei kiwon ki wow pyndam noh wei katkam kini ki kyndon du da kiwa mynjur da ki sorkar jylla, u Registrar General of India wa ka National Commission of Schedule Caste & Schedule Tribe u chong pyrkhat yeiwa dawa ki.
Lada ka National Commission of Schedule Caste & Schedule Tribe yoo biang ko yeiwa da dawa, ka u phah ko cha ka sorkar pyrdi yow pyrkhat ko wei lada yoo biang daw wanrah hapoh ka Parliament lyngba ka Bill yow pynbait yeini.
Kamtæ u Paul da ong u wa ka sorkar leh da mynjur ko yeini hanla da slem wow leh yeini yow pynbait noh yeiwa bakla wei daw thung leh da ka Department Committee yow puræ bniah yeini wei wow phah ko ya ka Report hapoh 3 bnai deiwa yaklam chwa wa waroh kiwa daw chah ktah wei kamjooh leh deiwa sñiaw ki MLA kamjooh ki ADC chwa wow phah cha u Registrar General of India.
Da ban joor u leh wa daw pyntikna wa kani ka Schedule Tribal Order u man ko kam wa em kiwa chong chnong ka Meghalaya.
U Adelbert hadien wa sñiaw yeini wa pynche u Paul da pynsñiaw u yei kmen wa da ye u wow thung yei symbe, kamtæ da pyndam noh u ya ka Resolution wa da wanrah u.
Discussion about this post