Ha ka 25 tarik uni u bnai, da pynlait ya ka Pnar Audio New Testament namo i pynkylla ktien Pnar ya ka Bible deiwa klam hei ktien Pnar kawa da pyntoh pyntne da ki dkhot ka “Pnar Linguist” wei da pynlait paidbah da u Rev. Dr. Robert Cunville, u dkhot ka United Bible Society ha ka yalang wa da pynman ha Bishop’s House Lumbihsyntu Soomer.
Yow yoh u ap u sñiaw ya kani ka Pnar Audio New Testament, ye u Download ya u App ko uwa pyrtuid Baibyl Pnar na Playstore lyngba ki Mobile Phone Android heiwa daw yoh u sñiaw ya ki kyntien yong ka Bible hei ktien Pnar katkam wa kwah na kiwon kiwon ki dkhot, ki lynnong kamwa da thoh ha ka Bible.
Ha kani ka yalang pynlait paidbah da emlang u Bishop ka Jowai, u Fr. Ferdinand Dkhar, u Dolloi ka Elaka Jowai, u Puramon Kynjing, ki Pastor, ki Tymmen Wasan waphær waphær kamjooh ki paaid wa ngait yong ki niam waphær waphær.
Ha ka yalang wa pynlai da u Eliphas Mukhim da yoh i rwai pdiang na u John S. Sungoh, i puræ ya ka ktien u Blai wei duwai na u Tbn. Herman K. Diengdoh wa i rwai kyrpang na u Tbn. Lyngkit Lyngdoh.
U Rev. Dr. Robert Cunville hawa klam dap u dei sñiawkmen wa kattu ki bru wa im ha Ri-loom Jaiñtia u ye noh ki u sñiaw yei ktien u Blai dei ktien Pnar, deiwa yooluti u leh wa kani ka Pnar Audio Bible u wai ko ya ka dwar bneiñ khnang wa boon ki mynsien bru u yoh myntoi ki manda ap ki yei sur klam na ka ktien u Blai.
Da pynkynmoo u wa heipor wa synchaar u Syiem Henry ha England, du dei ktien Latin donhi yoh u puræ Bible, tangwa sñiaw ngooh u wa katni da yoh u puræ hei jait ktien waphær waphær.
Pynkynmoo haroh u ya uwi u bru wa khroo yong u Blai uwa pyrtuid u William Tyndale uwa kwah ya ki bru England u puræ Bible ki dei ktien yong ki hi kawa man ka ktien English tangwa da kem noh ya oo wei rai pynyap.
Te ha kam kani ka sngi leh pynsñiaw u i sñiawngooh ya kiwa emkti wa da pynlut por u pynkylla ktien ya ka Bible chei ktien Pnar, iwa pynyoo wa ki leh embynta lang ki wa ki bru khroo neibynta ka ktien u Blai.
Chooh chooh ong u, i kaam wym pu kut i, wot hapyrdi i jia waphær waphær ha pyrthai, tangwa i angnood wow pynkylla ktien nang joor i neibhah dang boon ki wym pu yoh u pynkylla hei jait ktien yong ki.
Wei na ki 7000 tam ki ktien ha pyrthai dang du 800 tylli donhi kiwa yoh u pynkylla hei ktien yong ki, na itæ i daw i kaam dang boon bha i.
Da pynkut ya ka yalang dei klam e khublei na ka Balawanki Dann wa i duwai na u Richard Uriah.
Discussion about this post