Ki paidbah wa chong chnong ka Lapangap da wanpoi ki ha nongbah Shillong wow pynman yei lai paidbah wa jai-jai cha Secretariat yow pynsñiaw cha ka sorkar yei chem chitom nei chah pyndik wa jia ma jia ha ki Karbi wa ki pulit Assam, khamtam hawa yatoh wa ki thaw rep.
Kini kiwa chong chnong hapoh i yahkhmat ka Dorbar Chnong Lapangap ryngkat ki lama rong Blue, da wanpoi ki da ki Bus wa ki kari khian yow sdang yei lai paidbah na madan Malki chadooh khmat u mot yong Kiang Nangbah hajan Civil Hospital wei da thmu leh wow lai chadooh Secretariat.
Najrong ki lama Blue, ki mat dawa wa hakhmat dooh wa kiwa chong chnong dawa ki toh wow pynbait smat hajrong i chah pynthut wei i wym yoh ki wow rep dei suk ha ha ki thaw yong ki hi wei wow pynkynriah noh ya ka Police Camp yong ka Assam kawa da booh ha u Lum Pynthor wei wow pyndam noh chisiendon ya u GPS Line wa mih ha Google Map wa da pynlait yabor da ka sorkar Assam wei wow e yada wa pura ya kiwa rep ka chnong Lapangap.
Chooh chooh kiwa chong chnong ka Lapangap kiwa boon toh ki warep kiwa da rah leh ki Placard wa thoh, ‘La yap næ im ym e yei thaw yong i cha kiwi’, wa ‘Ka pynthor toh ka mynried yong ki khon yong i.’
Neiliang ki pulit da wan ki wow khanglaad ya ki paidbah wa lai toor ki chadooh cha Secretariat heiwa hei yaklam da sñiaw yeiwa ong ki ya ki pulit wow lai cha Border. Ha ini da mih i yaleh wa joor hapyrdi ki pulit wa ki paidbah kiwa da toor bait cha Secretariat.
Manda poi ha ka khyrdop ka Secretariat, da khut u Deputy Chief Minister, u Sniawbhalang Dhar ya 11 ngut kiwa yahkhmat yow yaklam.
Discussion about this post