theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Heh ka yaaw ha China Bazar wa lai kynreh kot ka JHADC chirup wa ki seiñbhalang

Jowai: Hadien wa yoh ujor na ki paidbah wa ong wa ka dukan wa em ha Police Point, Jowai kawa tip kam ka China Bazar ym biang kot biang sla ko, kamtæ ki ar seiñ wa kynthup ya ka JSU wa ka JYF da lai yachem ki ya u CEM ka JHADC u Thombor Shiwat hei yatoh wa ini. Kani ka dukan toh kawa dai ya ki tiar kynthai ki sula, ki kynjri, ki sah-chkoor, wa kiwi kiwi.

Ha ini i yachem da yahkhmat da u Rikut Parein wa u Poipynhun Majaw wei hadien ini u CEM da hukum u ya ka tnat Taxation Department ka Council wow lai kynreh ko ya ki kot ki sla kani ka dukan wei lada chem wymbiang ki wow khang noh ya kani ka dukan.

Advertisement ad1

Ha ini i lai kynreh da emlang ki wa yahkhmat kini ki ar seiñ wei da chem du ya u Manager kani ka dukan uwa man leh u baarjylla wa ki ar ngut kiwa kreh wei manda sdang takit ya uni u Manager boon hi ymye u wow jubab. Da kam uni u manager wa yoh tulop u T. 8,000 chi bnai wei ymtip pyrtuid u ya u tre kani ka dukan.

Hadien ini da wan u Dapoiwanmi Laloo uwa kam wa ini i dukan toh hei pyrtuid u wei da seiñ u ka lyngba i krehlang (partnership) wa kiwi ki bru mar chiteiñ (50-50) la chi bnai tam kattu. Ini da pynbood won ya i ya kylliang ktien i yania hapyrdi u Laloo, u Parein wa u Majaw, heiyatoh wa i mantre sakhiat yong kani ka dukan. Neiliang u Laloo da ong u wa da thung u ya ki bru wow pyllai ya kani ka dukan.

U Laloo da ong u wa da dep yaleh u ya ki kot ki sla na ka Sales Tax wei daw yaleh u sa na ka JHADC ya ki kot kiwa dang sah. Da kam u leh wa ha oo da biang lut ki kot ki sla wow pynsabut yei mantre yong oo ya kani ka dukan kam ka TIN, ka Labour License, wa kiwi kiwi.

Hadien ini da poi ki pulit yow pynjem ya kani ka ya awri awra hapoh i dukan.

Hei yaklam wa ki wakreh ka Taxation Department kiwa wan cha kani ka dukan wow sylli ya ki kot da ong ki wa ym ye u wai ya ka dukan khlem yoh ki kot ki sla na ka Council kam ka TCC wei da phah ki ya oo wow wanrah u ya ki kot kam ki ID Proof, ka NOC wa kiwi kiwi tangwa ympu em u wanrah u ya ki hadooh katni. Hei yatoh wa ini u Laloo da ong ubwa dang pynkhreh u ya ki kot ki sla.

Advertisement ad1
Share this:
Previous

Kynmoo warom ka TJSC ya ka sngi wa yoohjat u Tomas Jones ha ri-loom Khasi

Next

Sa 2026 ngut ki khynnah ki wym yoh admission ha KNGC