15 49.0138 8.38624 1 0 4000 1 https://wyrta.com 300 0

Sa 2026 ngut ki khynnah ki wym yoh admission ha KNGC
Ya ka B.Ed College ye u sdang ya ka ha u snem wow wan

0 Comments
Advertisement ad1

Jowai: Hadien wa ka Kiang Nangbah Govt. College da khang ko yei pynpsiah (Admission) ya ki khynnah puræ kiwa em hadooh 2149 ngut katkam wa ye ka College u pdiang ha waroh ki Class nadooh ki Higher Secondary wa ki Degree dang sah won sa 2026 ngut ki wym yoh u puræ ha kani ka College.

Kamtæ da mih i kulmar heiwa boon ki manbei manpa da dooh mynsien ki wei da sñiaw diaw ki wym yoh ki khon yong ki u puræ ha kani ka College. Hei yatoh wa ini ka Kiang Nangbah Govt. College Students Union (KNGCSU) da lai boh dorkhat wei da yachem ko wa u Principal Secretary yong ka tnat Puræ Puthi u D.P. Wahlang wei kamjooh ya u Director of Higher and Technical Education (DHTE) wa ya u Director of School Education and Literacy (DSEL) yong ka Sorkar Meghalaya wei da e ya kani ka dorkhat leh da e cha arngut ki Montri ka Sorkar Meghalaya ka Roshan Warjri wa pait ya ka tnat Higher and Technical Education wa ha ka Deborah C. Marak kawa pait yaka tnat School Education and Literacy yong ka sorkar meghalaya.

Advertisement ad1

Ka KNGCSU da pyntip ko katkam i yaklam wa u Principal ka Education Department Meghalaya kamjooh wa ki arngut ki Director ki da baan joor ki wa ki khynnah wa wan thooh thaw puræ ha kani ka College waroh toh u e thaw puræ ya ki neidaw wa boon toh kiwa wan na ki manyung wa dooh wa duk kamjooh kiwa na nongkyndong.

Neiliang u Principal Secretary u D.P. Wahlang da ong u wa oo sñiawkhia u hajrong ini wei oo leh da ong u wa waroh kiwa thooh thaw puræ toh u e laad ya ki waroh u psiah ki. Da kular u leh wa emkaam u pynbiang hi ka Education Department nadooh kiwa sikai hadooh ki kamra puræ wa chi por.

Hawa kylli hajrong ki phang dawa kiwa neiliang ka KNGCSU da dep booh ko da ka dorkhat haka Roshan Warjri wow pynheh ya ki kamra puræ (Extentsion of Building) kawa da dep mang poisa ka RUSA da ong u  wow sdang noh ha u Naiynñiaw uni u snem.

Hei yatoh wa ka B.Ed College won da ong u wa  ym ye u sdang ya ka ha uni u snem neibhah haap u pynbiang chwa ya waroh ki emkaam kani ka B.Ed College wei ya kreh wa lait ha kani ka B.Ed College da dep phah cha ka MPSC wa DSC yow leh ki yeiwa emkaam.

Ya ka B.Ed College ye u sdang ya ka ha u snem wow wan da pyntip u Wahlang.

Neiliang ka KNGCSU dang yang ki wow yohlaad wow yachem wa ka Roshan Warjri yow yaklam sa kiwi de ki phang dawa wa dang sah hei yatoh wa i emkaam ka KNGC.

Advertisement ad1

0 Comments

Leave a Reply